Kondisaun Portu Ki’ik Demora Halo Esportasaun

DILI, (ANTIL) - Diretór Kooperativa Kafé Timór (KKT), Sisto Moniz Piedade ba ANTIL, Kinta (13/10/2016) iha Bidau Lesidere hateten,  kondisaun Portu ne’ebé ki’ik dalaruma demora tempu atu halo esportasaun no importasaun.

“Importante mak esportasaun, kuandu ita halo demora ema klaim ita tenke kona multa, ne’e duni governu tenke tau prioridade ba esportasaun kualkér tempu de’it”, Sisto dehan.

Ho esportasaun ne’ebé tarde, akontese ona ba KKT iha fulan kotuk bainhira ró atu sai iha Sábadu, tanba de’it atividade Portu labele la’o,  entaun tenke  muda ba iha loron Segunda.

“Ida-ne’e mak difikuldade ba KKT tanba ita labele muda ema nia ró, kuandu sai nia data ne’e tenke to’o ona iha fatin, entaun ami tenke demora fali”, Sisto hato’o.

Nune’e, Sisto Moniz Piedade husu atu atividade portu tenke halo mós iha Sábadu atubele atende kompañia balun ne’ebé halo esportasaun.

Maibé atu halo atividade portuáriu nia durante oras 24 nia laran, governu tenke kria kondisaun ba servisu na’in sira.

“Dalaruma ró sai Sábadu ita labele halo buat ida, ne’e duni ami sei ko’alia ho Governu liuliu Alfándega para buat ida esportasaun ne’e ita tenke fó prioridade para ita-nia sasán ne’e bele sai”, Sisto hatete.

Maske  kondisaun portu hanesan ne’e,  KKT sempre servisu di’ak ho Portu no Alfándega. Governu ona iha planu atu harii ona portu foun.

Husu nia komentariu kona-ba  Alfándega implementa sistema foun, ho naran  Automated System for Custom Data (ASYCUDA)  iha faze pilotu, Sisto Moniz hatete,  kompañia seidauk hatene sitema foun ne’e. (Jornalista: Maria Auxiliadora/Editor: Otelio Ote)