Polítika Halot Restu Mortais La Efetivu

DILI, (ANTIL) – Deputada Parlamentu Nasionál hosi bankada Congresu Nasionál Rekonstrusaun Timor (CNRT), Albina Marçal Freitas sente preokupa ho Governu nia polítika  kona-ba halot restu mortais eroi no eroína Timor-Leste, ne’ebé oras-ne’e sei rai iha fatin, mesmu família entrega ona ba estadu.

“Jardin iha distritu mós balun iha ona, aliende jardin nasionál. Tanba ne’e, di’akliu halot ona ka lori mai halot iha Dili mós hanesan de’it”, Albina Marçal Freitas ba ANTIL iha parlamentu nasionál foin lalais ne’e.

Tuir nia, restu mortais sira ne’ebe  seidauk halot,  dala-ruma tanba ministériu relevante iha difisiensia ba difinisaun kona-ba ministériu nia programa prioridade.

“Programa prioridade mak iha ne’ebé? Maibé buat sira-ne’e iha, maibé implementasaun mak demora (la-efisiente). Ami kontinua fó hanoin ,” Albina katak.

Kona-ba orsamentu, deputada ne’e dehan, sem duvida. Karik laiha osan, nia hatutan, bele tau iha planu hodi submete ba parlamentu hodi haree no aprova.

Nu’udar feto faluk husi funu ne’e, deputada lamenta  tebes haree restu mortais sira  namkari iha fatin barak. Bainhira Timor ukun-án ona,  moralmente afeitadu ba família sira ne’ebé sei moris.

Tuir deputada Albina, restu mortais sira-ne’e tau kle’ur demais liu ona, balun rai ona tinan rua to’o  haat. Iha Lospalos to’o ohin-loron família  lamenta tebes.

Nia husu Ministériu Solidaridade Sosiál atu konsidera mos restu mortais ne’ebé eis gerileru Cornelio Gama L7 rekolla ona, hamutuk 449  seidauk iha atensaun hosi Governu, maske hatama ona proposta.

Alende ne’e, iha mos  problema veteranu balun simu ona pensaun hosi Governu, maibé to’o ohin-loron laiha kondekorasaun.  (jornalista: Manuel Pinto; editora: Rita Almeida)

Foto: Deputada bankada CNRT, Albina Marçal Freitas