Tarde Ona Manifestasaun Ba Leilaun Kareta Deputadu

DILI – Deputadu sira iha uma Fukun Parlamentu Nasional (PN) konsidera manifestasaun neebe halao husi estudante universitariu Timor-Leste tarde ona, karik halao deputadu sira bele tau iha konsiderasaun.

Tuir deputadu Joao Adriano husi Bankada PD hatete, haree ba demonstrasaun ou manifestasaun, neebe universidade sira halao ida nee direitu sira nian, hodi hatoo sira nia hanoin no halo asaun pasifika.

“Haree ba anifestasaun nee tarde oituan ona, mezmu sira iha direitu tomak maibe nee tarde ona. Maibe leilaun kereta nee desizaun husi konselu administrasaun depois lori mai iha plenaria,” katak Deputadu Adriano ba STL Kinta (17/08/2017) iha PN.

Maibe mos asaun hanesan nee halo kedas iha segundu lejislatura lae, hodi nunee too terseira lejislatura labele halo tan. Neebe iha momentu neeba sira halo kedas. Iha terseira lejislatura sei hola konsiderasaun para depois asuntu ida nee debate kedas.

Entretantu Deputadu husi Bankada Fretilin David Dias hateten, estudante sira halo manifestasaun nee sira nia liberdade atu halao.

Tuir deputadu Fretilin nee katak, nia hanoin kritika nee direitu demokrasia, iha ida-idak nia fatin, saida mak bele halo ba rai ida nee diak liu, neebe kritika atu nunee bele hadia malu, maibe labele insulta malu. 

Guilhermina Franco/Jacinta Sequeira | Suara Timor Lorosae