Líder partidáriu sira: Fretilin ho PD, iha Governu iha Timor-Leste, bele halo akordu pré-eleitoral

Fretilin ho PD, partidu sira iha koligasaun Governu nian iha Timor-Leste, bele hetan akordu pré-eleitoral ida ba apoiu maka'as hafoin eleisaun antesipadu sira ne'ebé previstu ba fulan-Maiu, no ladún provável koligasaun formal ida, haktuir hosi responsável sira ba Lusa.

Mari Alkatiri, primeiru-ministru no sekretáriu-jeral hosi Frente Revolucionária do Timor-Leste Independente (Fretilin) hatete ba Lusa katak sei hanoin buat hotu no hakat dahuluk ba debate maka konferénsia nasional partidu nian ne'ebé sei hala'o iha findesemana ne'e iha Maliana.

"Hanesan enkontru ida hodi debate prosesu tomak ne'ebé ami sei hasoru agora. Sei hanesan luta ida ne'ebé maka'as tebes maibé ha'u senti konfiante katak ami sei hetan maioria absoluta", Mari Alkatiri hatete.

Hatán kona-ba karik hakarak atu partidu rua ne'e ba hamutuk ka ketak-ketak, Alkatiri hatete katak sei halo komentáriu sira "iha tempu ikusmai, hafoin diálogu ho parseiru sira hosi PD", hodi subliña katak enkontru iha Maliana hanesan duni "hodi debate no defini asuntu ne'e".

"Akordu pré-eleitoral ida sei iha maibé ami sei ko'alia kona-ba modelu hosi akordu ne'e", nia afirma.

Adriano do Nascimento, hosi Konsellu Polítika Nasional (CPN) hosi Partidu Demokrátiku (PD) esplika mós ba Lusa katak nia partidu sei analiza asuntu no hafoin ne'e maka sei "foti desizaun ida".

Ministru Estadu iha Prezidénsia hosi Konsellu Ministru sira hatete mós katak sei hanoin asaun oioin maibé buat hotu indika katak partidu rua sei "kontinua serbisu hamutuk".

Dirijente importante sira hosi partidu rua analiza ona eventual akordu sira hodi hanoin iha eleisaun antesipadu sira ne'ebé maka Prezidente Repúblika Francisco Guterres Lu-Olo sei konvoka iha semana ne'e no ne'ebé karik sei hala'o iha loron 12 Maiu.

Hafoin konferénsia nasional sira ne'ebé maka partidu rua sei halo iha tempu badak, iha fatin ne'ebé la hanesan, antesipa enkontru bilateral oioin hodi taka no buat hotu hatudu katak sei iha akordu ida ka aliansa ba kolaborasaun hafoin eleisaun sira.

Partidu rua ne'e agora daudaun hanesan minoritáriu iha Parlamentu Nasional, ho fatin 30 hosi fatin 65, ho Fretilin kontrola fatin hamutuk 23 no PD kontrola fatin hitu.

Opozisaun, maioritáriu, harii hosi Congresso Nacional da Reconstrução Timorense (CNRT) - fatin 22 -, hosi Partidu Libertasaun Popular (PLP) - fatin ualu - no hosi Kmanek Haburas Unidade Nacional Timor Oan (KHUNTO) - fatin lima.

Forsa polítika tolu ne'e, iha semana liubá, anunsia katak sei aprezenta hamutuk ba votu antesipadu ho bandeira hosi Aliansa ba Mudansa no Progresu (AMP).

To'o agora forsa tolu ne'e serbisu hamutuk iha bloku Aliansa hosi Maioria Parlamentar (AMP).

SAPO TL ho Lusa