Autoridade filipinu sira aumenta ba ema na'in 16 vítima sira ne'ebé mate tanba rai-nakdoko

Autoridade filipinu sira aumenta ona, iha loron-tersa ne'e, númeru hosi vítima mortal ba na'in 16 kauzadu tanba rai-nakdoko ho magnitude 6,1 tuir eskala Richter ne'ebé maka rejista iha norte nasaun nian iha loron-segunda ne'ebé halo ona edifísiu barak monu.

Balansu ikus, ne'ebé halo entre tuku haat madrugada (oras Lisboa nian) hatudu ba ema na'in 11 mate no na'in 24 lakon.

Tuir informasaun sira ne'ebé avansa iha loron-tersa ne'e, autoridade sira tenta buka nafatin pelumenus ema na'in 30 ne'ebé maka labele sai hosi supermerkadu ida nia rahun.

Entre vítima mortal sira, na'in 15 rejista iha provínsia Pampanga, iha sentru hosi illa Luzón, besik kilómetru 100 hosi Manila, ne'ebé rai-nakdoko ne'e senti maka'as tebes, haktuir hosi Sentru Nasional ba Jestaun Dezastre sira nian.

Rai-nakdoko halo ona korte enerjia ne'ebé hamosu susar maka'as iha serbisu hosi sokorista sira nian iha kalan.

Governadora Pampanga nian, Lília Pineda, husu ona iha loron-tersa ne'e hodi deklara lalais "estadu kalamidade" nian iha provínsia ne'e "hodi bele ajuda lalais família sira vítima nian ne'ebé maka sira nia uma hetan estraga".

Rai-nakdoko, ne'ebé akontese besik tuku 17:10 (oras lokal) iha nia episentru ho klean ida kilómetru 40 no ne'ebé ba dala uluk rejista ho magnitude ida 6,3 tuir eskala Richter, maibé Serbisu Jeolójiku hosi Estadus Unidus no mós Institutu Vulkanolojia ho Sismolojia hosi Filipina nian muda valor ba magnitude 6,1.

To'o loron-tersa dadeer, rejista ona réplika hosi rai-nakdoko hamutuk 400 resin, maski ualu de'it maka senti liu, haktuir hosi Institutu Vulkanolojia ho Sismolojia hosi Filipina nian.

Lusa | SAPO TL