quinta-feira, 15 de dezembro de 2016

TL Kompleta Ona Nia Embaixada iha Rejiaun Sudeste Aziátiku

PARTILHAR
DILI, (ANTIL) - Embaixadór foun na’in tolu, kompostu husi Marçal Avelino simu pose ba Brunei Darussalam, Pasquela Barreto Guterres dos Santos ba Vietname no Maria Natália Guterres Viegas Carrascalao ba Laos.

Tomada depose ne´e fó hosi Prezisente Repúblika, Taur Matan Ruak iha Salaun Repúblika Populár Xina, Palásiu Prezidénsia Repúblika, Bairu-Pité, Dili, Kinta (15/12).

Ministru Negósiu Estranjeiru no Kooperasaun, Hernâni Coelho hateten, tomada de pose embaixadór foun sira ne’e, kompleta ona komprimísiu Sestu Governu Konstitusionál, bainhira asumi funsaun iha tinan 2015, katak, antes termina mandatu sei finaliza estabelesimentu ho nia funsionamentu en-plenu vizaun sira iha ASEAN laran.

Durante ne’e, Timor-Leste laiha embaxada iha Laos no Brunei Darussalam. “Ohin, embaixada TL estabelesidu ona iha nasaun membru ba ASEAN hotu. Koserteza ida-ne’e rekezitu ida, atu apoiu adezaun TL ba ASEAN,” Ministru Hernâni esplika.

Iha fatin hanesan, Embaixadora TL Ba Repúblika Populár Laos, Maria Natália Guterres Viegas Carrascalao sente onradu, bainhira hetan fiar sai embaixadora. “Ne’e orgullu boot ida ba ha’u. Primeira koiza, ne’ebé maka ha’u atu halo iha Laos maka tenke asenta relasoens diplomátikas, entre nasaun Timor-Leste no Laos ho forte teb-tebes. Tanba  ita besik atu adere ba ASEAN,” Maria Natália esklarese.

Aleinde ne’e, Embaixadora TL Ba Vietname, Pasquela Barreto Guterres dos Santos dehan, hanesan embaixadora, nia sei hametin relasaun entre TL no Vietname. “Buat ne’e importante teb-tebes, tanba bele kontribui maka’as adezaun TL Ba ASEAN iha tempu besik mai,” nia hateten. (Jornalista: Xisto Freitas/Editór: Otelio Ote)

Foto: Prezidente Repúblika, Taur Matan Ruak (liman karuk), Embaixadora TL ba Laos, Maria Natália Guterres Viegas Carrascalao (daruak hosi liman karuk), Embaixadora TL ba Vietname, Pasquela Barreto Guterres dos Santos (klaran) no Embaixadór TL ba Brunei Darussalam, Marçal Avelino Ximenes (liman loos), hasai foto hamutuk hafoin seremónia tomada depose. Foto ANTIL/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: