Ermera Apresia ho Programa Konta Bebé

Prezidente Autoridade Munisípiu Ermera, José Martinho dos Santos Soares  apresia simu programa “Konta Bebé” ne’ebé organiza hosi Primeira Dama Isabel Ferreira.

Tuir nia, programa ne’e di’ak tanba la haree ba kór partidu, relijiaun, rasa, no liu-liu tanba atu ajuda labarik hosi família kbi’it laek sira. “Programa ne’e di’ak tanba la’os haree ba kór partidu, relijiaun ou rasa, maibé ema ida ne’ebé laran luak, emprezáriu ida hakarak fó nia apoiu hodi ajuda bebé sira,” dehan José hafoin ramata inkontru entre lideransa lokal Ermera ho Primeira Dama, iha Sede Munisipal Gleno Kuarta (28/12/2016).

José esplika katak, programa ne’e ba suku ida labarik na’in rua (2) hodi hetan ajuda hosi emprezáriu Timor-oan balun ne’ebé fó ajuda ba labarik sira ho osan privadu. Ho oportunidade ne’e nia mós fó korajén ba Xefe Suku sira atu aprezenta ema sira ne’ebé merese duni atu hetan apoiu ida ne’e ba sira nia vida ba futuru.

Prezidente Autoriedade ne’e informa liu tan katak, Ermera iha suku hamutuk 52, tan ne’e posibilidade  iha labarik 104 maka bele hetan benefísiu refere ho osan hamutuk $ 30 kada fulan to’o labarik ne’e tama idade tinan neen (6). No osan $ 30 ne’e $ 15 sei utiliza ba sosan hahán báziku ba labarik nian, no $ 15 sei transfere ba sira nia konta bankária.

Kritéria atu hetan benefísiu ne’e maka labarik sira tenki sarani, ba misa, reja ka fiar na’in no seluk tan. Sé labarik seidauk sarani tékniku sira bele organiza atu labarik ne’e bele sai sarani no mós organiza atu inan-aman sira bele kaben.

Dadus ikus atu hatama ba tékniku sira maka iha dia 31 Janeiro dadus sira tenki tama ona no bainhira prontu hotu ona posibilidade iha fulan Abril doadores sira bele transfere ona osan ba sira nia konta bankária.

“Ha’u nia mensajén ohin ha’u fó ona ba Xefe Suku sira, Administradores Postu Administrativu sira katak, programa ne’e di’ak teb-tebes no objetivu kapas tebes, ne’eduni hotu-hotu tenki fó apoiu no haree sira ne’ebé maka merese duni atu hetan apoiu ida ne’e. No uza ema nia ajuda sira ne’e ho di’ak para  bele iha duni benefísiu ba ita nia oan sira iha futuru,” josé rekomenda ba lideransa lokal Ermera nian iha biban ne’ebá.

Iha fatin hanesan, Primeira Dama Isabel Ferreira haktuir katak, nia inkontru ho Administradór Ermera nian, Adminstrador Postu, no mós Xefe Suku sira kona-ba programa konta bebé nian tanba hetan doadores Timor-oan ida (Senhor James) ne’ebé nia hakarak fó apoiu kona-ba programa ne’e iha munisípiu Ermera.

“Ha’u mai halo enkontru ho autoridade sira iha ne’e hodi fahe mós informasaun kona-ba programa ne’e atu la’o oinsá, no presiza kritéria balun ne’ebé ke sira tenki prienxe. Liu-liu programa ne’e atu fó ajuda ba família kbi’it laek sira,” dehan Primeira Dama iha biban ne’ebá.

Iha oportunidade ne’e, nia haktuir mós katak, Programa konta bebé iha Munisípiu tolu (3) maka hetan benefísiu ba programa ne’e, no kada suku ida bebé na’in rua (2), maka hetan. Tuir kbi’it doadores sira nian, Munisípiu Liquiçá ho Díli iha 200 ital labarik. No konta ho Ermera la’o di’ak totál sei hetan 300 ital benefisiárius.

Ho programa ne’e, Primeira Dama mós ho ninia esperansa katak, maske uituan, maibé hala’o ho didi’ak sei sai fuan barak, no rezultadu di’ak, tanba buat hotu-hotu fila ba ida-idak nia vontade no fuan di’ak. “Kuandu ita halo buat ida ho domin, sei sai rezultadu ida ne’ebé di’ak,” dehan Primeira Dama. (Jon)

Matadalan