DISKONFIA UZA OSAN FALSU IHA KASINU, SIKN KAPTURA XINEZA 1

DÍLI - Diskonfia uza osan falsu hodi selu ema ne’ebé maka ba joga iha kasinu, Serbisu Investigasaun Kriminál Nasionál (SIKN) kaptura patraun xineza na’in ida ho inisiál YGH iha área Fatuhada.

Komandante SIKN, Superintendenti Ludgerio Lay informa, iha Segunda (12/10) tuku 16:00 Otl, sira nia parte simu keisa katak iha área Fatuhada ne’e uza osan falsu hodi selu ba ema ne’ebé maka ba joga kasinu ne’e.

“Momentu ne’e kedas ita husu autorizasaun ba Ministériu Públiku (MP) no MP orienta kedas hodi ba atua imediatamente. Ita to’o iha fatin konsege kaer duni patraun xines ne’e,” dehan Ludgerio ba jornalista sira iha Kuartel Jerál PNTL, Kaikoli, Tersa (13/10).

Nia hatutan, sira ba lori kedas sasán ne’ebé maka nu’udar evidénsia no mós lori kedas patraun ne’e ba iha polísia hodi halo identifikasaun, maibé saida maka sira hala’o ne’e bazeia ba orientasaun MP nian.

“Ita hala’o tuir orientasaun Ministériu Públiku nian no ita detein xineza ne’e tanba nia maka ita kaer iha fatin kedas ita konsidera hanesan flagrante deleitu ba ita. Tanba ne’e maka ita detein nia. Ami ba kaptura sira iha tuku 18 Otl kalan,” dehan Ludgerio.

Nia hatutan, kona-ba atu teste osan ne’ebé maka rekolla iha lokál de krimi ne’e sei koordena ho Banku Sentrál tanba SIKN rasik seidauk iha mákina teste kona-ba osan ne’e falsu ga lae? Maibé osan ne’ebé maka ema lori mai hato’o keisa ne’e falsu duni.

Nia dehan, osan ne’ebé maka SIKN prende iha kasinu ne’e ho montante $10.000,00 resin, no sei hala’o teste ba osan ne’e atu nune’e bele hatene loloos osan ne’e falsu ga lae.

“Ita diskonfia falsu maibé buat hotu tenki liu-hosi teste ba maka ita haree tanba ita mós laiha ekipamentu (alat) ita tenki serbisu hamutuk ho parte kompetenti hodi apoia ita,” dehan Ludgerio.

Nia hatutan katak, buat hotu ne’ebé maka prende iha terenu relata hotu ba MP tanba nia maka na’in ba prosesu tomak.

Tuir observasaun Timor Post nian iha terenu katak momentu membru SIKN nian tama ba fatin ne’ebé maka deskonfia uza osan falsu selu ba ema ne’ebé maka manán, haree patraun ho xineza balun joga namanas hela kasinu ne’e, no hala’o pasarevista durante oras balun nia laran lori kedas osan no na’in ba kasinu ne’e ba edifisiu SIKN Kaikoli.(Way)   

Timor Post