quinta-feira, 17 de agosto de 2017

Deputadu Buka Diak, Haluha Povu Moris Kiak

PARTILHAR
DILI - Movimentu Estudante Universitariu Timor-Leste, halao manifestasaun hasoru deputadu sira, relasiona lelaun kareta ho presu 8 mil. Tanba nee konsidera deputadu sira hasai rezolusaun  fo benefisiu ba sira nia aan, hodi haluha tiha povu  nia moris kiak.

Manifestasaun nee halao husi Estudante Universitariu Timor-Leste (MUTL) sira hodi hasoru deputadu sira iha kampus UNTL Parlamentu Nasional nia oin, Kinta (17/08/2017).

Iha manifestasaun Noe Bernadino Reprezentante Senadu UNTL hakilar, deputadu sira hasai rezolusaun hodi lelaun kareta no pensaun vitalisia hodi habokur sira nia aan no familia, maske agora povu barak sei morisn kiak no mukit, maibe deputadu sira tuur iha Parlamentu laran hodi halo aprova diak ba sira nia aan deit.

Ohin ita hamriik tanba haree ba kualidade edukasaun seidauk diak, aimoruk sei falta iha saude hodi atende ba povu sira, maibe deputadu sira iha parlamentu hasai rezolusaun hodi hetan prado no pensaun vitalisia hodi fo benefisiu ba sira nia aan,” hakilar estudante nee iha manifestasaun.


Nia mos hakilar, maluk estudante hotu atu labele tauk no hakiduk, tanba Timor  ukun aan ona. Uluk inan aman sira fo liman ba malu hodi kontra inimigu sira haruka fila ba sira nia rain. Tanba nee ohin halikar ba deputadu sira atu halakon hahalok aat sira nee, hahalok neebe sira halo fo benefisiu ba sira nia aan no familia deit.

Nunee mos Portavos MUTL (Movimentu Universitariu Timor-Leste) Miguel Nunes da Silva, hatete, sira nia manifestasaun ida nee, se karik laiha desizaun pozitivu husi Parlamentu Nasional sira sei kontinua manifestasaun ba oin. 

Guilhermina Franco / Jacinta Sequeira | Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: