Timor-Leste oferese nafatin vantajen ofisiál sira ho insentivu seluk ba investidór sira - ministru

Timor-Leste fó nafatin vantajen fiskál no insentivu sira seluk ba ema ne'ebé hakarak investe iha nasaun laran no serbisu daudaun hodi hadi'a defisiénsia sira ne'ebé sei ezisti iha termu lejislativu sira, haktuir hosi ministru Komérsiu.

Contâncio Pinto, ne'ebé kaer mós knaar ba Indústria ho Ambiente, ko'alia iha konferénsia imprensa ida ba aprezentasaun hosi reuniaun daruak Ministru sira Komérsiu CPLP nian no hosi Fórum Ekonómiku dahuluk CPLP nian ne'ebé hala'o iha semana oinmai iha Díli.

"Ami hatudu ba emprezáriu sira katak Timor-Leste hanesan nasaun estável ida, ho kondisaun sira ba investimentu. Ami nia lei investimentu oferese insentivu oioin relasionadu ho inzensaun ba taxa no asuntu sira seluk", nia hatete.

"Ha'u husu ba investidór sira atu mai koñese ami, koñese ami nia insentivu sira ne'ebé hanesan pozitivu tebes", nia hatete no refere katak enkontru sira iha semana oinmai sei permiti koñese oportunidade sira ne'ebé Timor-Leste oferese.

Nia fó hanoin, iha tempu hanesan, katak nasaun situa entre Austrália no Indonézia, "merkadu rua ne'ebé boot tebes no bele esplora hosi investidór estranjeiru sira" hahú hosi plataforma Timor-Leste nian.

Hanesan ezemplu, nia fó hanoin konstrusaun, iha tinan ne'e, hosi unidade ida fábrik simente nian hodi fornese merkadu australianu.

"Timor-Leste situa iha rejiaun ekonómika ativu tebes no bele sai hanesan odamatan hodi tama ka ponte ligasaun entre nasaun sira CPLP nian no merkadu Ázia ho Pasífiku", nia hatete.

Zacarias da Costa, eis-ministru Negósiu Estranjeiru sira no prezidente hosi komisaun organizadora ba Fórum Ekonómiku dahuluk CPLP nian, destaka ona interese katak enkontru ne'e sei dada empreza hamutuk 400 ne'ebé rejistadu.

Iha konferénsia imprensa hanesan nia subliña faktu katak empreza rejistadu sira mai hosi área oioin no iha "vontade boot ida hodi halo negósiu, hodi halo parseria sira" no hodi buka kontaktu no oportunidade sira.

To'o agora komisaun simu ona pedidu hamutuk 300 resin ba enkontru empreza sira nian, komponente prinsipál ida hosi Fórum Díli nian, ne'ebé sei hala'o iha 25 to'o 27 Fevereiru, hafoin reuniaun hosi ministru sira CPLP nian ne'ebé hahú iha loron-segunda.

"Timor-Leste simu bandeira negósiu hosi mundu, hanesan plataforma, hanesan fatin lansamentu ba rejiaun ne'e, ho kresimentu ekonómiku boot, ho dinamizmu maka'as", nia hatete.

"Tanba ne'e, ha'u fó apelu ba mobilizasaun hosi emprezáriu timoroan sira hodi partisipa. Ne'e hanesan oportunidade boot ida hodi halo negósiu sira. Hanesan ba dala uluk maka Timór simu eventu boot ida hanesan ne'e, ho empreza oioin hosi CPLP no hosi ASEAN no emprezáriu timoroan sira tenki aproveita", nia hatete.

Mensajen ne'e sei iha rezultadu ikusmai iha debate ne'ebé promove hosi televizaun Timor-Leste nian ne'ebé sei partisipa hosi ministru Estadu no Kordenadór hosi Asuntu Ekonómiku sira, Estanislau da Silva, ne'ebé insisti iha importánsia hosi enkontru sira semana oinmai ne'e no Jorge Serrano, emprezáriu timoroan no prezidente honra hosi Konfederasaun Emprezariál hosi CPLP nian.

"Ne'e hanesan oportunidade ba área privadu timoroan hodi hatudu, estabelese kontaktu importante sira no buka oportunidade sira. Tenki partisipa maka'as iha enkontru ne'e", nia hatete.

Delegasaun sira hosi nasaun 20 resin, entre sira maka estadu membru sira hosi CPLP no nasaun sira hosi Ázia no Pasífiku halo parte ona iha fórum, ne'ebé sei konta mós ho zona ida espozisaun nian ho "stand" nasionál hamutuk 30 resin, emprezariál sira no institusionál sira.

SAPO TL ho Lusa