Epoka 2018 LFA, Karketu Dili Fc kontratu jogadór famozu na’in 7

DILI - Bazeia transferensia jogador iha epoka 2018 LFA, Karketu Dili Fc positivu halo kontratu ona ho Jogador Lokal famosu nain 7 no Treinador Estrangeirus 1, ne’ebé seremonia assina kontratu refere realiza iha edifisiu TV Eto.Iha terseiru epoka 2018 LFA jogador (lokal) famosu nain 7 ne’ebé Karketu Dili Fc kontratu mai hotu husi pozisaun pergoju.

Mak hanesan, eis jogador DIT no Fc Cacusan Jose Fonseca (Mediu Central), eis jogador DIT no Cacusan Fc Framsyatma Kefin (Striker), eis jogador Academi Fc no Cacusan Fc Rofino Gama (Striker), eis jogador Zebra Fc Baba (striker), eis jogador Porto Taibesi Fc no Cacusan Fc Marcelino Fernandes (Striker), eis jogador Carsae Fc Jelvanio Alberto (avansadu skerda), eis jogador Carsae Fc Juvito Correia Da Silva (Defesa), inklui Treinador Estrangeirus Arcan Iurie (sertifikadu nivel-A).

Presidente Karketu Dili Fc Jose Adilson Ribeiro hatete, sorumutu ida ne’e halao atu selebra assina kontratu hamutuk ho Jogador Lokal famosu nain 7 inklui Treinador Estrangeirus nain 1, ne’ebé sei reforsa Karketu Dili iha epoka 2018.

“Iha terseiru epoka 2018 ida ne’e, ami klubu iha komitmentu hakarak utiliza jogador lokal, tanba hakarak promove sira ba oin. ne’e dunik agora ami nia tarjetu kompletu ona para kompete iha epoka 2018 LFA, hodi defende ami nia mehi sai Kampiaun”dehan Adilson ba Jornalista sira wainhira realiza assina kontratu iha edifisiu TV Eto.

Iha fatin hanesan Treinador Arcan Iurie Karketu Dili Fc hatutan katak, nia mai iha ne’e laos atu hamosu milagre, maibe nia mai atu atu fahe esperensia ba timoroan sira.

Tanba ne’e konaba tarjetu nia lakoi termina, tanba klubu hotu iha tarjetu, ne’e dunik nia husu ba jogador sira importante mak treinu masimu para bele hatudu masimu (positivu) iha kampo laran. Tanba sorti maromak mak termina.

“hau mai iha Karketu Dili Fc laos hare’e ba osan, maibe hau mai iha ne’e atu fahe esperensia ba timoroan sira hotu, liu-liu hasae konhesementu no kualidade jogador sira nian.

Ne’e dunik hau mai iha ne’e laos atu buka oin ka naran, tanba atu buka oin ho naran hau la persija mai iha ne’e, tanba hau nia kareira laos amatir, maibe profesional. ne’e dunik hanesan ema profesional hau persija fahe esperensia ba ema ne’ebé persija, laos tur nonok deit ho hau nia profesional”deklara Treinador Estrangeirus ne’e.

Entertantu iha fatin hanesan atual Jogador Karketu Dili Fc epoka 2018 Jose Fonseca senti orgulhu tanba Karketu Dili Fc hakarak kompras nia hodi reforsa hamutuk karketu iha epoka 2018, tanba ne’e hanesan jogador nia sei esforsu másimu ho kapasidade ne’ebé nia iha, para bele lori Karketu rejulta titlu Kampiaun. (BT)

Abilio | Business Timor