Kategoria Nasionál, Augusto Ramos Primeiru Lugár

DILI, (ANTIL) – Atleta Augusto Ramos ho númeru kompetisaun 1801 sai kuartu lugár kategoria internasionál iha Full Marathona ho kilómetru 42 no primeiru lugár kategoria nasionál iha Dili Marathona Internasionál ne’ebé hala’o iha Dili, Domingu, (9/10).

Ramos hatete, nia sente orgullu tanba konsege sai kuartu lugár iha eventu ne’e maske kondisaun la permite, laiha ema ruma fó apoiu maibé ho kbiit sira nian bele ultrapasa difikuldade sira ne’e.

“Durante ne’e ami nia Federasaun maka tau matan ba ami. Laiha Komisaun ruma ou patrosinadór ruma proteje ami,” nia tenik ba jornalista sira iha Palásiu Governu, Domingu.

Iha eventu sira hanesan ne’e, nia haktuir, sira maka eroi ba nasaun maibé durante iha prosesu treinu nia laran, laiha ema ida konsidera sira katak sira maka eroi ba nasaun no sai embaixadór ba nasaun iha kompetisaun internasionál.

Nia sujere ba parte kompetente kuandu eventu boot hanesan ne’e, tau matan ba atleta nia kondisaun. Labele bainhira atleta sira partisipa hanesan ne’e maka foin konsidera katak ne’e atleta nasionál.

Ramos hato’o mensajen ba joven timoroan sira katak hakarak sai atleta hanesan nia tenki evita hemu tua, fuma sigaru no tenke badinas involve-án iha desportu para koko forsa.

Iha primeiru Dili Marathona International ne’ebé hala’o iha tinan 2010, Augusto segundu lugár no primeiru lugár atleta hosi Kenya.

Antes ne’e, atleta internasionál sira ladun partisipa iha Dili Marathona International maibé tinan ida ne’e atleta internasionál liu-liu hosi Kenya hamutuk ema na’in 13 maka partisipa entaun susar ba atleta nasionál sira atu hetan primeiru lugár to’o terseiru lugár.

Atleta Kenya nu’udar atleta ne’ebé hetan prestasaun di´ak iha mundu. (jornalista: Xisto Freitas; editora: Rita Almeida)

Foto: Atleta Augusto Ramos (klaran tara númeru 4) dada iis hela hafoin ramata kompete. Foto ANTIL/Xisto Freitas

LEE LIU IHA ANTIL