Autoridade timoroan sira hahú ona
preparativu ba eleisaun antesipadu sira, ne'ebé inklui resenseamentu nasional
foun nasional no iha estranjeiru no kampaña ida hosi edukasaun síviku, maski
seidauk iha loron markadu ba votu, hatete hosi fonte sira hosi instituisaun
responsável sira.
Hodi hatene rekizitu tékniku sira
no situasaun atual, Prezidente Repúblika, Francisco Guterres Lu-Olo, iha
loron-segunda ne'e hasoru malu ho ministru Administrasaun Estatal, Vicente
Ximenes no mós ho responsável importante sira hosi Komisaun Nasional Eleisaun
nian (CNE) no hosi Sekretariadu Tékniku hosi Administrasaun Eleitoral (STAE).
Lu-Olo sei rona mós partidu sira,
hodi bele fó sai loron ba votu antesipadu iha semana ne'e nia laran, nune'e,
hodi hanoin iha lei eleitoral ne'ebé iha vigor - ne'ebé defini kalendáriu total
hosi loron 80 - sei hanoin votu ba semana dahuluk fulan-Maiu nian.
CNE ho STAE la konkorda iha nia
avaliasaun prazu nian, CNE hakarak votu ida iha fulan-Maiu no STAE hakarak iha
liu tempu hodi halo preparasaun ne'ebé presiza.
Maski seidauk hatene loron, CNE
ho STAE halo ona ativasaun ba mákina eleitoral sira ne'ebé maka uza ona hodi
halo serbisu ba eleisaun prezidensial ho lejislativu sira iha tinan 2017, no
ne'ebé maka aprezenta ona iha loron-segunda ne'e ba reprezentante sira hosi
grupu diplomátiku.
Alcino Baris, prezidente CNE
nian, hatete ona ba Lusa katak preparasaun sira hahú ona no proposta ne'ebé
hato'o ba xefe Estadu maka hala'o eleisaun iha fulan-Maiu, hodi kumpri saida
maka "defini iha lei".
"Lei ajuda ita nia
entendimentu no ba ami fulan ne'ebé di'ak liu maka fulan-Maiu. Maibé prezidente
maka desidi. Ami hein taka kalendáriu operasional no hafoin ne'e ajusta
atividade tomak tuir ne'e", nia afirma.
"Ami bele hahú bainhira iha
aprovasaun ba loron", nia esplika.
Acilino Manuel Branco, diretór
jeral STAE nian, fó hanoin ba Lusa katak prazu ideal mínimu maka prepara asaun
eleitoral ruma maka fulan neen no órgaun ne'e iha "besik 80%" hosi
responsabilidade sira relasionadu ho organizasaun tékniku votu nian.
"STAE presiza liu tempu hodi
halo preparasaun. Atu bele vota tenki halo asaun oioin, halo fali levantamentu
hosi sentru sira votasaun nian, rekruta ofisial eleitoral sira no brigada sira,
operador sira sistema nian ho fó liután tempu ba resenseamentu", nia
esplika.
"Buat sira ne'e demora iha
mínimu fulan neen, tanba ne'e agora ami husu liután tempu", nia hatutan no
admiti katak STAE "sei preparadu hodi implementar desizaun ruma hosi señór
Prezidente".
Kalendáriu eleitoral hanesan
klaru "no labele inventa", Branco hatete no refere katak iha detalle
iha lei 9/2017 ne'ebé defini "sekuénsia hosi atividade sira hosi prosesu
tomak", hahú hosi aprezentasaun ba kandidatura sira no rekursu sira ba
kampaña no mós aspetu sira seluk hosi votasaun.
Agora daudaun, no maski laiha
loron markadu, STAE hala'o ona levantamentu hosi sentru sira votasaun nian -
hodi verifika karik balun ne'ebé uza iha 22 Jullu 2017 afetadu ka la'e durante
époka udan nian - hala'o hela rekrutamentu ba brigadista sira no operador sira.
"Ami fahe ona material sira
iha munisípiu sira no iha loron-kinta ami lansa prosesu foun resenseamentu nian
iha Gleno, iha súl Díli nian", nia esplika.
Prezidente Repúblika fó sai iha
janeiru kona-ba sobu Parlamentu Nasional no sei konvoka eleisaun antesipadu
hanesan solusaun hosi problema polítika ida.
SAPO TL ho Lusa
Sem comentários:
Enviar um comentário