DILI, (TATOLI) – Reitór
Universidade Nasionál Timor Lorosa’e (UNTL), Francisco Miguel Martins, husu ba
lider, funsionáriu tékniku no administrativu, profesór no estudante sira katak
labele halo kobransa ba estudante sira bainhira la iha despaxu ofisiál husi reitória.
Se aktu ida ne’e akontese, konsidera ilegál no tentativa prátika korupsaun.
“Ita dehan katak la iha tan
kobransa, osan mak selu iha rejistu, instrusaun tuun tiha ona husi reitór ba
instituisaun para labele iha kobransa ba estudante sira. Ha’u rona iha kobransa
balun-balun iha ita-nia leet, ne’e kobransa ilegál”, dehan reitór perante
estrutura makro no mikro UNTL iha Kampus Sentrál UNTL, segunda ne’e.
Tanba ne’e ita hotu evita, tuir
lei, prosedimentu ne’ebé mak iha ita hetan kondenasaun, tuir lei. “Agora
ita-nia maluk sira, ukun na’in sira ba bebeik. Tanbasá? Tanba buat sira ne’e
hotu. Ita iha universidade atu eduka ema ho didi’ak, eduka ema sai ema”, dehan.
Hotu-hotu tuur iha ne’e, Konsellu
Jestaun no Desizaun, simu kna’ar espesialmente. Tanbasá? Esperiénsia mai barak,
kanál espesiál ne’e nia prestíjiu akadémiku ne’e aas tebes.
Refleta ba situasaun ne’e, haree
katak labele marjinalizmu. Ema ida ne´ebé mak liuhusi kanál espesiál, iha
akadémia, nia matenek, kapaz tebes.
“Fó oportunidade ba ema; buras, sa’e,
eleva ninia kualidade. Tanba ida ne’e mak ha’u husu ba ita hotu atu kumprende
polítika instituisaun ninian, desizaun institusionál ninian”, nia husu.
Desizaun ne’ebé tuun ba karaik
la’ós desizaun pesoál, desizaun Konsellu Jestaun. Jestaun orsamentu ne’e
desizaun Konsellu Jestaun, kompostu husi profesór sira hotu, husi fakuldade
sira hotu nomós akadémiku tomak.
“Ita tenke intende didi’ak, se la
intende ko’alia ida ba ida, prontu ita dehan ne’e mak loos, bele rubah (muda)
situasaun. Ikus fila fali mai ita dehan afinal das contas ita presiza
hatene”, husu tan.
Francisco Miguel Martins
akresenta dezenvolve UNTL, fó tempu ba ema atu aprende, nune’e Nasaun sei
dezenvolve. “Ita iha país jigante rua nia leet; riku, rekursu umanu aas no
barak tebes, tanba ida nee ita labele toba.
Iha prosesu dezenvolvimentu nia
laran, prosesu ida dinámika, kontinua, evolui, muda ba bebeik de’it. Iha tempu
ruma ita harii no fortifika.
Tinan kotuk loke kanál espesiál,
simu réjime foun, réjime ida jerál; ida ne’ebé mak avalia husi Ministériu
Edukasaun, mai husi rezultadu ezame nasionál. Kanál ida fali, kanál pelaoportunidade;
fó tempu ba sira ne’ebé mak liu ona 2016, tuir teste, ta’is tuir sira-nia
poténsia akadémika ninian. Iha kritériu atu halo selesaun ida ne’e ho rigór.
Komisaun ida konjunta husi
Ministériu Edukasaun nomós husi UNTL hala’o ho rigór. Tinan ne’e di’ak liu.
Kanál ida fali kanál espesiál;
universidade hala’o, dezenvolve, kria tuir lei baze edukasaun (artigu:
ekuidade) katak demokrasia no polítika. Polítika dezenvolve no hariiku, hasa’e
ema nia kualidade, fó ema sira matenek ba ita-nia rain.
Demokrasia fó oportunidade ba ema
ne’ebé la iha oportunidade. Ekuidade, sira ne’ebé marjinalizadu dezde tempu
Indonézia nian la hetan oportunidade ida ne’ebé mak di’ak atu hetan edukasaun
ida kualidade no di’ak iha universidade ne’ebé di’ak.
Universidade iha responsabilidade
sosiál ba sira-nia sidadaun, kria oportunidade ida ne’e para sira ne’ebé
marjinalizadu uluk, rezisténsia sira-nia oan, veteranu sira-nia oan, martíres
sira-nian oan (mate hela iha funu laran). Kriasaun ne’e ba ida ne’e.
Nomós atu eleva kualidade
edukasaun ba PNTL (Polísia Nasionál Timor-Leste), F-FDTL (Falintil-Força da
Defesa de Timor-Leste), funsionáriu públiku fó oportunidade ba sira atu mai
foti edukasaun ne’ebé kualidade iha universidade ne’e.
La’ós taka matan, hala’o,
implementa buat ne’e ho lei baze edukasaun atu kria kondisaun ruma, ekuidade ba
ema ne’ebé marjinalizadu, ai-leba sira-nia oan, fó oportunidade mastenke
ho rigór. Ita komprova; veteranu sira-nia oan hatudu deklarasaun Komisaun
Omenajen, nune’e mós martír sira-nia oan. F-FDTL hatudu deklarasaun husi
superiór, irarkia. PNTL mós hanesan, nune’e mós funsionáriu públiku.
Ne’e la’ós tuur, mehi de’it, pois
implementa. “Ha’u hakarak hateten, instituisaun atu dezenvolve ema tenke
hanoin, ligasaun ho buat sira ne’e tuir lei baze edukasaun. Tane aas lei no
orden ba timoroan sira. Tanba ida ne’e mak ita tenke hanoin no husu tanbasá”.
Dijitalizasaun Mak Sala
Reitór UNTL mós klarifika: “Lista
sira ne’ebé akompaña iha facebook dehan ema tama sala, ne’e la’ós
sala, dijitalisaun mak sala, la’ós tama husi ida siénsia sosiál ba medisina
jerál, Lae! Ne’e sistema mak sala. Sistema dijitalisaun mak sala”.
“Maibé ne’e hadi’a hotu ona,
hatuun tiha ona mai iha administrasaun akadémiku, sira mós sei haree tuir fila
fali, la’ós tama mai, hanesan matan dukur, tau loos de’it, lae!”, afirma
Francisco Miguel Martins.
Rejistrasaun ikus ne’e iha
rejistrasaun akadémiku, rejistrasaun akadémiku ne’ebé iha sei kanaliza tuir
prosedimentu.
“To’o sesta-feira kuandu taka,
ida ne’e ita hanoin katak ema atu mai barak afinál das contas mai
ninia númeru ne’e três mil oito centos de’it. To’o sesta-feira
ita taka. Ha’u hanoin katak ema atu sa’e mai boot, afinal das contas ema
la mai barak”, haktuir.
Universidade nu’udar instituisaun
públika estadu ne’ebé nia kriasaun, inovasaun, fó tempu ema atu aproveita, ita
simu ho liman rua, fó edukasaun ho intensaun di’ak ba sira.
“Iha área espesífika ne’ebé nia
hili. Sira la mai, ita la obriga, mai ita simu, serve didi’ak sira”, konklui.
Jornalista: Rafy Belo | Editora:
Rita Almeida
Imajen: Reitór Francisco Miguel
Martins. Foto: Media UNTL
Sem comentários:
Enviar um comentário