TIMOR OAN MAK FO ESPASU HATAMA DROGA

Komandante Jeral (Komjer) Polisia Nasional Timor Leste (PNTL, Komisariu Julio Hornai, hatete, Timor oan tenke iha konsiensia hodi responsabiliza no asegura nia rain. Maibe droga tama iha Timor Leste tanba Timor oan maka fo espasu hodi tama.

Tanba ne’e, tuir komisariu Julio Hornai, kombate droga responsabilidade ba ema hotu hotu nian, tanba droga hanesan inimigo bo’ot ba nasaun Timor Leste.

“Kuandu ita Timoroan tomak maka sente liafuan ida deit katak lae ba droga, hau sente se deit mos labele tama, maneira oinsa mos labele tama, karik tama loron aban ka bainrua ita bele detekta tanba nia sei lakonsumu ba ema seluk, sé konsumu ba rai Timor, i sé nia liu dalan teritoriu Timor nian ita ida rua sempre hatene tanba ida rua matan naklosu ba osan hodi taka imformasaun bele estraga ita nia nasaun,” dehan, Julio Hornai Ba jornalista sira, iha Quartel Jeral PNTL Kaikoli, Tersa (14/07).

Nia argumenta liu tan, ema sira ne’ebe maka hakarak kopera hodi hatama droga estraga nasaun, tanba osan ka buat material ninia folin la bo’ot liu dignidade nasaun tanba ne’e inisiativa diak maka husik ki’iak diak liu duke simu inimigu bo’ot ne’e hodi espalla  hodi estaraga nasaun.

“Timor oan tenke konsiensia katak diak liu ki’iak, maibe hau iha dignidade ida katak sai nain ba rai ida ne’e iha responsabilidade hodi asegura husi saida deit, tanba buat ida osan ka material la bo’ot liu dignidade nasaun” Julio Hornai  subliña.

Komisariu Julio Hornai fundamenta liutan katak, nasaun ida  tenke  prevene ba droga, Polisia iha dever maximu atu kombate droga iha ne’ebe deit, tanba laiha fatin iha Timor  atu simu droga.

Nia hatutan, atu halo prevensaun droga mai Timor Leste importante mak hotu hotu tenke kopera imformasaun ba parte seguransa karik iha ema ruma ne’ebe maka lori droga tenke imforma imediata ba polisia para halo atuasaun lalais.

“Importante maka hotu hotu tenke apoiu imformasaun bainhira hare ema ruma lori tama droga no konsumu droga besik karik imforma imediata ba polisia para ita kombate, Hau  hanoin ita hotu hotu iha responsabilidade atu kombate,” Julio Rekomenda.

Hornai reforsa katak, ekipamentus ka fasilidade modernu oinsa maibe importante maka povu Timor tomak hotu tenke sente katak nudar nain ba rai tanba terus Timor oan sente Timor oan maka sente diak Timor oan maka diak.

“Faktores sensitivu liu maka ekonomikamente sei ki’ik no naton, entaun ema dezempregu mos barak. Husi ne’e maka ema koko atu hetan osan, hodi espalla buat at ne’e ami, ita konseteza sira hafuhu se maka servisu hamutuk ho sira. Klaru  katak servisu hamutuk ho sira para sira fo osan para atu kopera  maibe nia lahatene katak nia hakoi hela ninia an.” nia hatete.

Julio Hornai informa katak, fatin risku ba droga maka hanesan bar, maibe kuandu polisia konsentra makas ba bar, dalaruma sira muda fali ba fatin seluk maibe polisia kontinua esforsu liu husi informadores sira hodi kombate.

Hatan mos konaba Timor Leste ohin loron sai fatin tranzitu ba droga, Julio Hornai esplika, PNTL kontinua buka meios hodi kopera ho nasaun vizinho nune karik iha husi nasaun sira ne’e ema ruma maka atu tama Timor informa lalais para polisia halo prevensaun.

Nune mos, Nia hatete, parte polisia liu husi seksaun droga kontinua kopera ho Migrasaun, Polisia Maritima, Polisia Fronteira, Portu no Aeroportu hodi halo prevensaun.

“To’o ohin  loron ita kaptura ona nain 11 kazu droga,ema sira ne’e hahu husi 2010 to’o agora no ninia rezultadu balun para ona iha prizaun bekora hodi responsabiliza sira nia hahalok.” Komjer Julio Haktuir.

Husi kazu droga 11 ne’e, Nia haktuir, kompostu husi Timoroan nomos estranjeiru no kurir droga balun nebe mak deportasi ona ba sira nia nasaun orijin. Eus

Jornal Nacional