PRESIDENTE FOUN CNE…!!!

Jornal Nacional, editorial

Parlamentu Nacional tersa feira nee konvoka plenaria extraordinari hodi halo eleisaun Presidente Comissão Nasional das Eleições (CNE) foun atu bele lidera orgaun eleitoral nee ba periodu tinan nen (2016-2022).

Kandidatu ba Presidente Comissão Nasional das Eleições iha nain lima, komisario Alcino de Araujo Barris, Bernardo M. N. Cardoso, José A. da C. Belo, komisaria feto na’in rua, Odete M. Belo no Maria Virna E. Soares.

Husi prosesu votasaun nee ikus mai Komisariu Alcino Barris mak eleitu ho votus 45, antigu Presidente CNE, Komisariu Jose A. Belo ho votus 9 no Bernado Cardoso hetan votus 2, enkuatu kandidatu feto nain rua la hetan votus.

Presidente CNE eleitu, Alcino de Araújo Barris  hanesan eis Ministru Interior iha Governasaun FRETILIN nian ne’e, reprezenta husi Parlamentu Nasional no nomeia husi bankada parlamentar FRETILIN.

Ho resultadu votus nebe iha maioria deputado FRETILIN no CNRT vota ba kandidatu FRETILIN nian nee hodi lidera orgaun eleitoral nebe komunga prinsipiu nudar orgaun independente no imparsial.

CNE nudar orgaun eleitoral ho knar konstitusional atu halao supervizaun ba eleisaun hotu-hotu hodi garante Sufrajiu Universal, direktu, livre no periodiku iha Nasaun Republika Demokratika Timor Leste.

Agora duvida mak oinsa komisariu ida halao ninia knar suprevizaun ho independente no imparsial, garante sufrajiu universal, direktu no livre  se komisariu rasik iha tusan politiku ho partido politiku ka uza kamisa partido politiku ida nian?, lahatene los.

 CNE ohin loron nee lahanesan ho CNE anterior. CNE uluk iha komisariu 14 hodi halo supervizaun ba aktu eleitroal hotu hotu maibe revizaun lei eleitoral foun nee komisariu iha deit ema nain 7 tan nee sei difikulta CNE atu halo superevisaun ba eleisaun iha tinan oin mai.

Nunee mos komisariu CNE antigu sira halo supervisaun ida nebe regiroso, kritika partido politiku sira nebe viola lei eleitoral no mos kritika Partido politiku sira iha Parlamentu Nasional nebe hetan subvensaun publiku maibe laiha relatoriu no laiha sede iha munisipiu sira.

Agora Prezidente Comissão Nasional das Eleições (CNE) foun nee bele banati tuir regirocidade nebe komisariu anterior halao ona durante nee ka lae? publiku hein servisu CNE nian.

Tamba CNE nia knar no misaun ne’e nudar lejitimasaun ba Orgaun Estadu hotu-hotu iha Timor Leste atu ukun, ho nune’e hametin liu tan kultura demokrasia Timor Leste nian, hodi hatudu nafatin ezemplu diak ba Mundu internasional.

Nunee mos ironia oituan iha PN, durante nee Feto Parlamentar tane as iguladiade jeneru, defende direitu feto nian no mos defende emansipasaun feto maibe kandidatu feto ba Presidente CNE laiha feto ida iha Parlamentu Nasional mak fo votus kandidatuhusi feto nian.

Ne’ebe distintu deputada sira lalika obriga ema seluk atu defende direitu feto nian se deputada sira rasik ka represetante feto iha Parlamentu nasional rasik la defende ninia feto maluk sira hodi ukun.

Maske imparsialidade no independensia CNE kestionadu maibe hakarak ka lakohi deputado sira mak ita nia representante hodi hili ona lideransa CNE nee. Nee mak lalaok demokrasia representantiva. Ne’ebe parabens ba presidente CNE eleitu, Alcino de Araújo Barris e votus susceso ba ita boot. *