MP: Indonezia Tenke Seriu Buka Ema Lakon

Membru Parlamentu (MP), Deputadu Arao Noe de Jesus Amaral, husu ba governu Indonezia atu hatudu komitmentu seriu hodi buka tuir Timor oan ne’ebe lakon iha tinan 1975 to’o 1999.

Tuir nia, durante ne’e governu Indonezia seidauk hatudu sira nia seriedade ho maximu, kolabora ho governu Timor-Leste hodi buka tuir Timor oan sira ne’ebe lakon iha tempu ne’eba.

“Governu Indonezia tenke seriu buka tuir timor oan sira ne’ebe lakon,” MP Amaral sujere, iha Parlamentu Nasional.

Objetivu buka tuir ema lakon sira ne’e, nia dehan, la’os atu loke fali kulpa ne’ebe akontese iha pasadu, maibe hanesan reunifikasaun familiar.

“Importante ba ita mak sira hatene sira nia familia no kria kontaktu familiar ba malu,” nia hateten.

Bazea ba dadus Comisaun Acolhamentu ba Verdade e Rekonsiliasaun (CAVR) hatudu katak total ema lakon iha pasadu hamutuk 4 mil, maibe nia dehan, to’o agora seidauk konsege hetan hotu.

“Iha tinan 2016 ne’e ami konsege aprova osan $100 mil ba provedoria dos direitus humanus atu buka tuir ema sira ne’e,” nia informa.

Hatan ba kestaun ne’e Vise Komisaun Nasional ba Direitus Humanus Indonezia  (KOMNASHAM), Dianto Bachariadi, katak sira tenta (bebeik) hodi halo diskusaun ho governu Indonezia kona ba asuntu ida ne’e, maibe to’o agora seidauk iha reasau n ne’ebe pozitivu.

Maibe, nia promete sei ho esforu tomak, husu ba governu Indonezia atu hatudu nia seriedade apoia KOMNAS HAM hodi buka tuir ema sira ne’e.

“Ami sei hato’o ba governu Indonezia, atu hatudu sira nia komitmentu hodi apoiu ami hodi buka ema sira ne’e,” Bachariadi hateten.

Tuir lolos governu Indonezia estabelese komisaun ida hodi buka ema lakon sira ne’e, tanba tuir nia iha rekomensaun CAVR mensiona asuntu ne’e.

“Maibe to’o agora Indonezia seidauk harii komisaun ne’e, tanba ne’e ami ho PDHJ no sira seluk foti knaar hodi buka tuir ema lakon sira ne’e,” nia hateten.

Nia mos, husu ba komisaun lia los no amizade bele involve KOMNAS HAM iha senior meeting hodi hafasil liu tan servisu KOMNAS HAM nian hodi buka tuir ema lakon sira ne’e.

Iha parte seluk Provedor Direitus Humanus e Justisa (PDHJ), Silverio Pinto, hateten PDHJ hamutuk ho KOMNAS HAM Indonezia no organizasaun balun hahu halo servisu lubuk ida ona hodi buka tuir ema lakon sira ne’e.

Mesmu seidauk masimu liu, maibe nia dehan, prosesu sira ne’e hahu hatudu nia progresu, tanba iha tinan kotuk (2014) konsege hetan ona ema nain 15 no iha 2016 mos lori tan ema nain 15 mai Timor hodi hasoru sira nia familia.

“Ne’e servisu ne’ebe defisil, maibe ami koko lori ona sira balun mai hodi hasoru sira nia familia,” nia hateten.

The Dili Weekly