MOTIVU MEMBRU F-FDTL TIRU AAN, HEIN PROSESU INVESTIGASAUN

Diki - Atu identifika membru Falintil forsa Defeza Timor-Leste (F-FDTL) ho kargu Segundu Sarjentu João B. Xavier nebe tiru aan iha Centru Formasaun Metinaro, sei hein prosesu investigasaun.

Ministru Defeza, Cirilio Cristovão haktuir, membru F-FDTL nebe tiru mate nia aan iha Metinaru sei iha prosesu invest­igasaun. Polisia Militar mak hatene hodi halo prosesu investigasaun mak foin bele hatene motivu husi tiru aan nee.

“Membru F-FDTL tiru aan duni ho informasaun nebe mak ami simu maibe maluk sira hein tanba sei iha prosesu inves­tigativu husi Polisia Militar mak bele hatene loloos,” haktuir Cirilio ba jornalista, Kuarta (08/04/2015) iha Palasiu Prezi­densial Nicolao Lobato.

Iha fatin hanesan, Xefe Estadu Major Jeneral F-FDT, Major Jeneral Lere Anan Timur dehan, nia parte rona infor­masaun wainhira halao enkotru ho Prezidente Republika, Taur Matan Ruak.

“Hau foin rona informasaun nee wainhira halao enkontru ho Prezidente Republika, nebe ita presiza identifika lai,” dehan Lere.

Iha fatin ketak, Brigadeiru Jeneral F-FDTL, Filomeno Paixão esplika, membru F-FDTL nain ida nebe tiru aan nee mai husi Centru Formasaun ho naran João B. Xavier ho kargu Segundu Sarjentu.

“Kronolojia husi akont­esementu nee seidauk hatene loloos, maibe servisu Polisia Investigasaun hahu halo investigasaun kona ba nia mate,” katak Filomeno.

Hodi Instituisaun F-FDTL nia naran, Brigadeiru nee hatoo sentidu kondelensia ba familia matebian. João B. Xavier sai membru F-FDTL hahu iha tinan 2002. Iha tinan kotuk nia monu ho motor, nunee ain sorin alezadu. Jacob tiru nia aan iha kuaze tuku 8 dader oras Timor Leste. Jacob mai husi Postu Administrativu Laga, Muni­cipiu Baucau, nia isin mate sei halo autopsia iha Hospital Nasional Guido Valadares.

Mate Isin iha HNGV hodi Halo Autopsia

Akontesementu tiru aan husi membru F-FDTL nee laos foin dala ida, maibe soldadu ida nee tan ba dala haat ona, no ema nain haat maka mate ho modelu tiru aan.

Tuir Brigaderu Jeneral F-FDTL, Filomeno Paixão, kron­o­lojia husi akon­tese­mentu nee seidauk hatene loloos, maibe servisu Polisia Investigasaun hahu halo investigasaun kona-ba kazu nee.

“Hau hanesan Brigadeiru lori instituisaun F-FDTL nia naran hatoo sentidu kondolensia tanba ohin F-FDTL lakon tan nia mem­bru ida. Tanba nee instituisaun ida nee hatoo kondolensia ba familia matebian, bele hamutuk hodi haloot mate isin nee. Tanba nia mos fo ona ninia aan ba rai ida nee,” dehan Filomeno.

Matebian João B. Xavier tama forsa iha tinan 2002. Iha tinan kotuk ba nia monu ho motor nia ain sorin alezadu tiha. Foin dadauk nee, nia koko atu lori pistola tiru aan maibe la konsege. Horseik dader tuku 8 liu nee maka kala nia tiru aan hodi mate fatin.

“Hau simu ona informasaun katak matebian nee tiru aan iha parte kakorok nian, la hatene tanba sa, ida nee maka sai perguntas ba ema, ou keta dalaruma nia alezadu nee mak nia hakarak oho aan karik, maibe matebian nee nia maka fo seguransa ba iha armazen kilat nian iha Metinaro. Ohin dader tiru aan hodi mate fatin,” haktuir membru F-FDTL ida.

Entretantu Komandante Servisu Investigasaun Kriminal, Ludgero Lay hatutan, kazu nee tama ona iha prosesu investi­gasaun nia laran, no mate isin lori ona mai iha Hospital Nasional Guido Valadares hodi hahu halo autopsia. Timotio Gusmão/Madalena Horta

Suara Timor Lorosae