FO OAN BA OAN FETO RASIK, AS TAMA KADEIA TINAN 28

DILI - Tribunal Distrital Dili (TDD) aplika pena prizaun tinan 28 no indimizasaun $2500 ba arguidu AS, tanba provadu halo krime violasaun seksual agravadu hasoru nia oan feto rasik NJB neebe momentu nee ho tinan 14.

Liu husi leitura akordaun Tribunal lee sai faktus provadu katak arguidu halo duni praktika relasaun seksual ba NJB, neebe lezada hanesan nia oan feto rasik. Arguidu halo relasaun seksual nee iha Ermera, hahu iha Outobru 2012 to 2013 no kuntinua halo to lezada isin rua. Maske isin rua, arguidu kontinua halo violasaun seksual to lezada halo fulan nen iha Marsu 2014 mak para relasaun seksual tanba lezada nia kabun bot. Nunee iha Junu 2014 nia laran lezada hahoris bebe feto ida.

Arguidu halo violasaun seksual ba nia oan feto bainhira nia kaben ba tiha halo natar iha sub-distritu Hatulia, mak arguidu aporveita tempu hodi halo violasaun seksual ba nia oan feto numeru 5, husi maun alin nain hitu. Arguidu nia kaben so tempu deit mak mai uma, ho ida neemak arguidu mos kuntinua halo hela deit relasaun seksual ba NJB hamutuk 18. No arguidu mos konfesa ba Tribunal katak nia halo duni relasaun seksual ba nia oan feto NJB neebe iha tempu nee sei ho idade menor.

Hare ba sirkuntansia hirak nee, Tribunal aplika pena prizaun tinan 28 ba arguidu AS. No arguidu mos tenke selu indimizasaun ba lezada ho valor osan $2500. Informasaun kompletu iha STL Jornal no STL Web, edisaun Kuarta (06/4/2015). Domingas Gomes

Suara Timor Lorosae