PRO KONTRA DIALOGU HO MAUK MORUK

Publikasaun media Diaria loron hirak ikus ne’e kontinua domina husi kazu Paulino Gama ‘Mauk Moruk’ nian, maibe publikasaun sira nee kontra produtivu, li-liu karta nebe gabinete Presidensia Republika nian nebe familia no advogado Mauk Moruk nian hetan katak Presidente Republika ho governu hili ona Lauriado Nobel da Paz, Jose Ramos Horta hodi halo dialogu ho Mauk Moruk atu bele solusiona problema nebe akontese durante nee.

Antes nee advogadu no Familia Mauk Moruk fo sai deklarasaun katak Presidente Republika ho Governu hili ona, Lauriado Nobel da Paz, Jose Ramos Horta hodi halo dilogu ho Mauk Moruk maibe parte governu nian rezeita katak governu seidauk hili ema ida hodi halo dialogu ho Mauk Moruk.

Governu kontinua mantein posizasaun katak Mauk Moruk komete krime tenki responzabiliza ba ninia aktu krime nee iha tribunal, tan nee baseia ba resolusaun Parlamentu nian governu finansia Komando Operasaun Konjunta (F-FDTL ho PNTL) hodi halo operasaun kaptura Mauk Moruk.

Maske governu nega katak too ohin loron nee seidauk hili ema ba dialogu ho Mauk Moruk maibe parte advogadu apresenta evidensia karta legal husi gabinete Presidensia Republika nian nebe temi mos governu ba dezisaun hili Jose Ramos Horta.

Karik publiku akompanha didiak, karta Presidensia Republika nian no deklarasaun parte governu nian nee kuaze la sinkron tamba governu representa husi Sekretario Estado no Ministru Defesa, karta Presidensia Republika asina husi Xefi Casa Civil, Aniceto Neves.

Ne’ebe diferesia ideia sira nee mosu karik governu nian reprezenta husi Primeiru Ministru foti desizaun la konsulta ka koalia iha Konsellu Ministru tan nee membru governu balu lahatene saida mak Primeiru Ministru deside hodi nunee hamosu polimika.

Agora governu hili ka lahili Ramos Horta hodi halo dialogu ho Mauk Moruk, bele iha razaun maibe evidensia karta eskrita Gabinete Presidensia Republika nian nebe familia no advogadu fo sai nee, halo governu mos koalia ladiak.

Los duni, Presidente Republika bele iha kompetensia tamba knar no responsabilidade Presidente Republika ida mak koalia konaba garante estabilidade no soberania nasaun nian, tan nee Presidente bele buka meus ida nee hodi resolve problema.

Maibe posizaun governu nian mos los tamba durante nee governu gasta osan bar-barak, harii Komando Operasaun atu oinsa bele kaptura Mauk Moruk ho ninia grupo nebe komesa halo anarkismu, tiru kanek membru FDTL ida, hakanek polisia no hadau pistola no mos ataka Presidente PN iha Baguia nebe resulta membru polisia kanek nebe ikus mai apoiu dialogu fali nee mos ladun diak. Agora hetan lia los, Primeiru Ministru Rui Maria de Araujo mak tenki esplika ba publiku, tebes duni ka lae governu nia involvimentu hodi hili Jose Ramos Horta hodi halo dialogu nee, se lae, bele mosu presidente ida katak iha governu laran larona malu.

Membru governu koalia ida, xefi governu deside oin seluk, nee halo governu laiha unidade, ida idak lao ninian, nee bele governu lakon konfiansa.

Ne’ebe hakarak ka lakohi, Primeiru Ministru ka Ministru Presidensia Konsellu Ministru nudar porta voz governu tenki esplika posizaun governu nian ba karta nebe Presidensia Republika nian nee, atu nunee hatudu katak governu iha lian ida deit, se lae governu nee hanesan samea, ikun lao ketak, ulun lao ketak. *

Jornal Nacional, opiniaun