Mina Timor dada kompañia Malaysia atu Investe iha TL

DÍLI - Kompañia operador ne’ebé mak iha esperensia ba esplorasaun mina no gas  kuinesidu iha Malaysia nomos mundu ho naran Matrade iha interese atu halo investimentu iha Timor-Leste liu –liu iha area Mina no gas. Tuir Ministru Petroleu no Rekursu Minerais (MPRM) Alfredo Pires katak kompañia Matrade iha interese boot atu investe iha Timor-Leste tanba Timor-Leste mos nudar nasaun ne’ebe mak riku ba iha Mina no gas.

“Liu husi Embaixada Malaysia no departamentu Malaysia kona-ba negosiu Matrade  sira organiza delegasaun ida mai iha Timor Leste atu hare oportunidade no hau hare sira mos komesa hatene ona kona ba ita hahu book supply base tanba ne’e sira hare oportunidade atu mosu ona no sira mos bok an atu establese relasaun ho Kompañia Timoroan ne’ebe ita hatene katak agora ita komesa hela mais sira mos komprende katak uluk sira mos hanesan nee no ohin loron sai fali oin seluk,” dehan Ministru Petroleum i Rekursu Minerais (MPRM) Alfredo Pires ba Jornalista sira iha Timor Plaza Kinta (13/08).

Tuir Alfredo katak delegasaun Malaysia mai iha Timor-Leste hodi kria relasaun  ne’ebé diak atu bele  hamutuk no ajuda nasaun foun ne’e liu liu iha esplorasaun mina no gas nian.  “Delegasaun ne’e halai ba iha mina jeral laos tasi mane deit no tasi mane nian mak prosesu supply base, tanba ita presiza fatin ida para establese sira nia negosiu iha nee, tanba Malaysia laos rai ida ne’ebe la kuinese maibe sira mos uluk iha ne’e mak petronas no agora sira mai fali ho kompañia sira tanba Malaysia rasik iha kompañia rihun tolu ka hat ne’ebé involve iha industria mina iha sira nian nomos iha international,” katak nia.

Nia mos afrima katak delegasaun ne’ebé mak iha fo koragen ba iha TL bazea ba iha potensialidade ne’ebé mak Timor-Leste iha  no pronto simu hodi liga ho empreza timoroan sira ne’ebé iha hodi bele partisipa mos. Nia dehan oras ne’e dadaun iha kampu bayung Undang nomos kampu sira seluk  iha kompañia atus hitu mak fornese sasan oin –oin  tanba Timor-Leste seidauk prontu no preparadu maksimu maibe ba oin Timor-Leste sei muda tanba hetan esperensia ona husi kompañia seluk.

“Kona-ba mina bayung udan kompañia atus hitu (700) fornese sasan oin oin deit  iha ne’eba tanba ita sidauk prontu no preparadu maksimu maibe ba oin ita tenke muda ,buat ne’ebe mak ita fo garantia ba sira mak tenke halo infranstruturas, ita nia emprezariu sira mos tenke pronto no ita mos halo esforsu makas ona ba ita nia rekursu humanus entaun sira mai bele entrega ema sira ne’e hodi fo treinu tanba durante tinan hirak liu ba ita mos halo ita nia preparasaun no restu hanesan negosiu.

Alfredo mos informa katak Malaysia nudar nasaun ne’ebé mak kuinesidu mos iha mundu tanba ne’e Timor-Leste lapresiza ona halo konvense hodi sira atu halo investimentu iha Timor-Leste. Iha fatin hanesan Embaixador Malaysia ba Timor-Leste, Tajulaman Mohammad hateten katak delegasaun Malaysia halao seminario kona ba mina no gas tanba kompañia refere durante ne’e haree liu ba iha prosesu mina no gas. “Delegasaun ne’e mai sira haree ba buat oin –oin maibe liu-liu mina no gas tanba durante ne’e sira serbisu mos iha area mina nian  iha Indonesia nomos Malaysia”, dehan Tajulaman.

Nia mos afrima katak liu husi vizita ne’e oinsa mak bele hao koneksaun ho empreza nasional hodi involve hamutuk ho kompañia Malaysia hodi haree ba iha Mina no gas. Nia dehan misaun no visaun kompañia Malaysia laos deit atu haree ba iha halao produsaun mina maibe mos fo formasaun ba ema hodi kria rekursu hodi bele jere mina rasik. “Ami laos haree deit ba halo produsaun ka esplorasaun maibe ami mos forma ema oinsa bele serbisu rasik ba  mina, ida ne’e mak objetivu ita nia,” katak nia.

Iha biban ne’e mos Prezidente Camara Comersio Industria Timor-Leste (CCI-TL), Oscar Lima hodi seitor privadu Timor-leste nia naran husu ba governu atu fo mos oportunidade ba setor privadu nasional hodi serbisu hamutuk ho empreza internasional mina no gas nian ne’e hodi hetan esperensia ruma tanba setor privadu nasional seidauk iha kuinesementu diak ba iha prosesu esplorasaun mina no gas.

“Tanba nee mak hau husu ba iha Ministru no mai husi Malaysia buka oinsa bele kopera ho empreza timoroan hodi bele husik netik oportunidade ba ita nia emprezariu timoroan sira ne’ebé mak moris ho mina bele aprende buat ruma ho sira tanba Malaysia iha esperensia ba iha Mina no gas,” dehan nia. Hatan ba iha kestaun ne’e Embaixador Malaysia iha Timor Leste Tajulaman M. hateten katak bainhira kompañia Malaysia Investe iha Timor-Leste sei koopera mos ho seitor privadu rai laran.

“Ita mos sei involve seitor privadu rai laran hamutuk ho kompañia Malaysia ne’ebé mak durante ne’e esperensia iha mina no gas atu nune’e bele  fahe matenek ba malu tanba ita sei forma ema atu servisu rasik  ba iha Mina Timor,” katak embaixador ne’e.Iha biban ne’ee mos diretor Kompañia Matrade Malaysia, Abu bakar Koyakutty hateten mos katak bainhira sira investe iha Timor-Leste sei koopera ho seitor privadu rai laran hodi bele fo formasaun ba sira atu nune’ebé bele serbisu rasik ba iha Mina Timor. Iha Seminariu refere halao iha Timor Plaza andar 5 ne’ebé partisipa mos husi Kopana ANP, Seitor Privadu rai laran nomos delegasaun sira besik ema lima nulu. (BT)

Business Timor