CHINA APOIA MILLAUN US$ 13 BA TIMOR LESTE

Governu China liu husi koperasaun bilateral apoia orsamentu millaun US$ 13 ba Governu Timor Leste hodi uza atu dezenvolve komersiu industria Timor Leste nian.

Ministru Negosius Estranjeirus no Kooperasaun (MNEK), Hernani Coelho informa katak, nia hasoru malu ho Ministru Negosius Estrnjeirus China ninian, hodi ko’alia kona-ba asuntus kooperasaun bilateral entre rai rua ne’e ninian.

Iha sorumutu ne’e, Hernani Coelho ho Ministru Negosius Estranjeirus China ko’alia liu kona-ba pasu konkretu ba kooperasaun rai rua ne’e nia ba futuru.

“Iha tempu badak, ita se iha enkontru nivel teknika ninian, entre China ho Timor Leste, atu estabelese ita nia mekanismus de kooperasaun, husi 2016 ba oin ninian. Iha biban ida ne’eba mós, China anunsia ninia apoiu foun id aba Timor Leste, atu bele apoiu ekonomika ida spontan ba Timor, purvolta de US$ 13 Miloens, para ita bele uza ba dezenvolvimentu área komersiu industria sira ne’e,”dehan Hernani Coelho ba jornalista sira iha nia kna’ar fatin MNEK Dili, Sesta (18/9).

Nia hatutan, China mós pronto atu ajuda joven sira husi Timor Leste, li-liu atu fó formasaun kona-ba, área saida mak Timor Leste persija. “Ita konvida sira, karik iha tinan oin, sira bele mai vizita Timor Leste, hodi haree ita nia sistema sira iha ne’e, para haree área saida mak sira bele koopera ho ita kona-ba buat sira ne’e,”relata Hernani.

Nia haktuir, China mós pronto atu simu joven sira husi Timor Leste, ne’ebé mak hakarak atu ba simu formasaun iha China.

Alende ne’e, Hernani mós informa katak, iha okaziaun ne’e mós, nia halo enkontru ho Ministru reprezentante Ministru Negosius Estranjeirus Japaun ninian, hodi ko’alia mós kona-ba asuntu kooperasaun.

“Ita konsentra liu kona-ba áreas navegasaun marítima ninian, infraestruturas, rodobiariu nomós infraestruturas produsaun,”informa Hernani.

Nasaun China la’os foin mak apoia Timor-Leste maibe nasaun ne’e apoia ona Timor-Leste iha parte politika nian ne’ebé momentu neba ulun bo’ot Timor-Leste nian halo deklarasaun independensia unilateral iha tinan 1975. China mos iha tempu restaurasaun independensia nia laran apoia ona TL maka’as tebes hanesan halo gratuita edifisiu Palasiu Prezidensial Aitarak Laran Dili, Ministerio Negosius Estranjeirus iha Praia dos Coqueiros no apoia seluk ba dezenvolvimentu rai ida nian.cos

Jornal Nacional