Portugés sira iha Timor-Leste iha difikuldade hodi vota tanba atrazu sira iha korreiu

Eleitór portugés sira nebe resenseadu iha Timor-Leste ladún haksolok ho posibilidade atu sira nia votu iha lejislativu sira iha fulan-Outubru bele la kontabiliza tanba atrazu sira iha korreiu timoroan nian.

Iha semana ne'e ema barak maka foti tiha ona boletin sira votu nian iha korreiru sira iha Díli - sidade nebe la halo distribuisaun ba korreiu - no hetan informasaun katak boletin sira karik bele demora entre semana tolu ka fulan ida hodi to'o iha Portugal.

Iha problema ne'e, karik boletin sira sei la to'o iha Portugal antes loron 14 fulan-Outubru nebe hanesan loron limiti hodi kontabiliza ba eleisaun sira.

"Ko'alia beibeik no insentivu hodi atu ami ezerse ami nia direitu votu. Kumpri prosedimentu sira hodi bele vota. Halo resensiamentu no hein ansiozu ba loron nebe ó tenki tau krús iha surat-tahan (...) maibé loloos ne'e ó labele vota ka (...) karik ó nia votu sei la to'o iha tempu útil iha Portugal", hatete hosi portugeza ida iha nia pájina Facebook.

Sira seluk prepara hela deklarasaun hamutuk ida hodi esplika difikuldade sira hodi haruka boletin sira ba Portugal hodi buka alternativu ida.

Situasaun oin-seluk ida aplika ba eleitór portugés sira nebe resensiadu iha Portugal no, entre loron ohin to'o loron-kinta, bele bolu antes iha Embaixada Portugal iha Díli - hodi hili deputadu sira liuhosi sírkulu eleitorál nebe sira inskrita.

Iha kazu ne'e, hanesan Paulo Maia Silva, nu'udar enkaregadu hosi seksaun konsulár iha Embaixada Portugal iha Díli, esplika ona ba Lusa katak boletin sira sei haruka liuhosi mala diplomátiku, nebe implika, no la hanesan ho boletin sira hosi sidadaun portugés sira seluk "la uza korreiu timoroan sira nian" no sei to'o iha Portugal "iha prazu másimu semana ida".

Iha semana liubá, embaixada portugés husu ona autorizasaun atu haruka mós billete sira votu nian hosi eleitór sira nebe resensiadu iha Timor-Leste liuhosi mala diplomátiku, desizaun nebe labele foti hosi autoridade eleitorál sira.

Bainhira Lusa husu ba Sekretaria-jerál hosi Administrasaun Eleitorál nian iha loron-sesta, hatete katak votasaun hosi emigrante portugés sira nebe resensiadu iha estranjeiru sei hala'o liuhosi posta, hanesan hatete iha lei, no labele iha alterasaun sira.

Tuir fonte hanesan, laiha posibilidade hodi haruka liuhosi mala diplomátiku tanba Dekretu-Lei nº 95-C/76, loron 30 Janeiru, relasionadu ho organizasaun hosi prosesu eleitorál iha estranjeiru, refere katak "eleitór rezidente iha estranjeiru ezerse nia direitu votasaun liuhosi postál no hamutuk iha asembleia sira rekolla nian no kontajen votu nian hosi rezidente sira iha estranjeiru".

Paulo Maia Silva esplika ona ba Lusa katak embaixada portugés halo nafatin "esforsu tomak" hodi bele apoia sidadaun portugés sira hodi vota.

"Vale tebes esforsu hodi entrega boletin votu nian. Tenki vota. Indikasaun sira hatete katak liuhosi korreiu sira haruka ba Portugal demora entre semana ida to'o fulan ida. Bainhira iha semana tolu nia laran entaun sei to'o ho tempu", nia hatete.

Bainhira hatán kona-bá autoridade konsulár sira apela ona ba rejistu no resensiamentu hosi sidadaun sira iha Timor-Leste - maski hafoin ne'e laiha garantia katak sira bele vota - Maia Silva hatete katak responsabilidade ba atrazu sira iha korreiu timoroan nian la'ós hosi embaixada ka Estadu portugés nian.

"Hanesan regra sira nebe la defini hosi ha'u nia knaar iha MNE. Iha Portugal ha'u ko'alia tiha ona kestaun ne'e iha fulan ida liubá. Sira hatán mai ha'u katak sei haruka lalais boletin sira", nia hatete.

SAPO TL ho Lusa