ISABEL FERREIRA: PRIZAUN FATIN ATU HADIA-AN

Primeira Dama Timor-Leste, Isabel Ferreira hatete, prizaun la’os fatin atu kastigu deit dadur sira, maibe fatin ba dadur sira atu hadia an.

“Prizaun fatin ida ne’ebe fo mahon imi, imi la bele senti ne’e hanesan prizaun maibe ne’e hanesan mahon ida ba imi atu horik ba. Imi tama iha fatin ida ne’e atu hadia an, no wainhira sai husi fatin ida ne’e tenki hatudu hahalok ida ne’ebe mak diak iha imi nia familia, sosiedade nia let hodi kontribui ba dezenvolvimentu nasaun ida ne’e nian,”hatete Primeira Dama Isabel Ferreira, wainhira halao Natal hamutuk ho dadur sira iha Prizaun Gleno, Ermera, Segunda (21/12).

Primeira Dama dehan, iha tempu adventu ne’e importante ema kristaun atu prepara an hodi partisipa iha Natal ida ho ksolok, Natal kmanek ba ema ida-idak no familia.

Primeira Dama mos koalia sai mensajen Amu Papa Francisco nian katak, iha tinan ida ne’e prezente ida diak liu iha tempu Natal ba ema kristaun maka tenki iha komunikasaun ba malu, atensaun ba malu, fo tempu ba malu.

“Hau hanoin ida ne’e prezente ida diak liu. Ha’u bele fo ba maluk sira iha tempu adeventu atu tama ba Natal. Selebra Natal iha 24 ho 25 hamutuk, maibe iha tempu adventu ita nia kontaktu hodi fo hanoin ba malu, atensaun no solidariedade ba malu, ida ne’e prezente ida hanesan ita kristaun halo ba malu iha tempu atu tama ba Natal. Ha’u la lori prezente ba imi, maibe ha’u lori domin no orasaun ba imi iha ne’e, atu ita reza nafatin,”dehan Isabel Ferreira.

“Fizikamente ita dok malu maibe iha orasaun ita besik hasoru malu hela. Ha’u mai ho ekipa bo’ot ida jornalista barak akompanha ha’u atu vizita fatin ida ne’e atu pasa Natal iha fatin ida ne’e, ne’e mos ksolok ida tanba normalmente vizita prizaun so familia sira,”dehan nia.

Iha vizita Primeira Dama nian ba prizaun Gleno hodi selebra Natal hamutuk ho dadur sira ne’e, Primeira Dama fo apoiu solidariedade Karau Vaca ida ba sira hodi festeza Natal hamutuk.

Nune’e mos Diretor Estabelesementu Prizaun Gleno, Nito M dos Santos iha nia diskursu hatete, sira agradese tebes ba Primeira Dama nia laran diak hodi fo apoiu solidaredade balun iha Prizaun Gleno hanesan Karau ida no festeza Natal hamutuk ho dadur sira.

“Ami agredese tebes ba inisiativa primeiru Dama nian hodi mai halao festa natal hamutuk ho dadur sira iha ne’e,” Direktor ne’e hatete.

Nune’e mos iha oportunidade ne’e, dadur Idalina Freitas ne’ebe reprezenta dadur Prizaun Gleno hamutuk 106, liu husi nia puizia hatete, sira senti kontenti tebes ho vizita Primeira Dama ho nia ekipa hodi selebra Natal hamutuk sira iha Prizaun Gleno.

Tuir observasaun JN-Diário nian ba iha seremonia Natal hamutuk ne’e, dadur sira simu Primeira Dama ho nia komitiva ho muzika Natal nian no puizia ne’ebe sira prepara no mos dadur balun simu ho matan ben.Des

Jornal Nacional