Koreia-Súl no Japaun hetan akordu kona-bá "feto sira ba konfortu nian"

Iha loron-segunda ne'e Koreia-Súl ho Japaun hetan ona akordu ida kona-bá asuntu delikadu kona-bá atan seksuál hosi feto koreanu sira iha Funu Mundiál II, haktuir hosi ministru Negósiu Estranjeiru súl-koreanu nian.

Akordu ne'e sei sai hanesan "finál no labele muda" bainhira Japaun kumpri nia responsabilidade sira, afirma ona hosi xefe diplomasia hosi Koreia-Súl, Yun Byung-Se, iha deklarasaun sira ba jornalista sira, hafoin diálogu sira ho nia homólogu japunés, Fumio Kishida.

Ministru sira Negósiu Estranjeiru nian hosi Koreia-Súl no Japaun hasoru malu iha loron-segunda ne'e, iha tuku 14:00 (oras lokál), iha Seul, hodi trata kestaun delikadu hosi feto koreanu sira ne'ebé ezérsitu japunés sira obriga halo prostituisaun durante okupasaun japuneza nian (1910-1945).

Xefe diplomasia Japaun nian, Fumio Kishida, fó sai katak Tókio kompromete fó osan ien millaun 1.000 (besik euro millaun 7,6) ba fundu ida kompensasaun nian ba "feto sira ba konfortu nian".

Iha konferénsia imprensa ne'ebé halo hamutuk ho nia homólogu súl-koreanu, Yun Byung-se, ministru nipóniku hato'o "deskulpa maka'as" hosi Governu japunés ba estraga sira ne'ebé feto koreanu sira hetan.

"Asuntu kona-bá feto sira ne'ebé fó konfortu (...) akontese ho envolvimentu hosi ezérsitu japunés (...) no Governu japunés senti iha responsabilidade maka'as", afirma hosi ministru.

Karik iha feto 200.000 resin - ne'ebé hanaran "feto sira ba konfortu nian" - tropa nipóniku sira obriga halo serbisu seksuál sira ba tropa sira, feto sira ne'e barak liu mai hosi Xina no península koreanu no akontese entre tinan 1930 iha sékulu liubá no iha Funu Mundiál II nia rohan iha tinan 1945.

SAPO TL ho Lusa