La Hili Lata, Sé maka Atu Fó Osan?

Moris maka problema, problema maka moris. Laiha maris problema mós laiha, laiha problema ne’e la’os moris. Moris iha problema tanba nesesidade. Nesesidade obriga ita ema atu halo saida de’it tanba moris.

Tanba de’it moris iha nesesidade nia laran, maske idade avansadu (60) ona mós tenke hikis kosar metan suli, haleu sidade Díli hodi halibur kalen át atu bele hetan netik duit metan ruma hodi hatán ba nesesidade loron ida nian.

Katuas fuuk mutin ona, fíziku komesa fraku ba daudaun, ruin komesa malahuk, forsa be laiha ona, la’o metru atus ida (1) ou rua (2) tenke deskansa maibé tenke esforsa-án nafatin hodi dolar rabat rai maka bele hetan osan dollar.

“Ita la hili lata hanesan ne’e, sé maka atu fó osan ba ita”. Liafuan ida ne’e obriga avo katuas Orlando Soares tenke la’o iha loron manas laran, hakat estrada ba estrada, hosi jardin ida ba jardin seluk, hosi foer fatin ida ba foer fatin seluk, la sente kolen no hamlaha hodi esforsa án atu hetan de’it dollar.

Dala barak ema katuas ona ne’e túr de’it iha uma hodi hein oan sira maka fó han no hemu, maibé Orlando nia hanoin diferente ho katuas sira seluk, lakohi túr de’it iha uma, oan no bei oan sira  maka fó han, maibé nia mós hakarak esforsu án nafatin hodi buka osan lor-loron hodi sustentan ba nia-án no mós ba nia família sira.

Hafoin  Orlando hili lata no nakonu ona no nia tuku hela kalen serveza nian iha Merkadu Tais Kolmera nia oin, Jornalista Matadalan hakbesik án ba husu, tanbasá maka avo hili lata ne’e? Nia hatán ho hamnasa ho oin midar hodi dehan, lori ba tetu iha Aitarak laran.

Tetu kilo ida hira? “Kilo ida 40 cent. Ita la hili lata hanesan ne’e, sé maka atu fó osan ba ita,” nia dehan. Nia oras ne’e hela ho nia sobriñu sira iha Kampung Alor.

Tempu to’o ona atu deskansa iha uma hodi goza vida katuas nian, maibé tan de’it kondisaun moris ho neseidade, Orlando  tenki sakrifika nia án la’o hadulas  Díli hodi buka lata át sira hodi troka ba osan.  Hulan plástiku boot rua ne’ebé nakonu ho lata mamuk, bainhira la’o senti kolen Orlando tenki buka mahon hodi deskansa iha mahon, hodi tuku lata tui-tuir dalan hodi hateke ba ema ne’ebé la’o ba mai liu kona nia oin.

Maske ema barak maka la’o ba mai liu-hosi nia oin hodi hateke nia, maibé Orlando la liga. Preukupa liu maka tuku nia lata hodi ba fa’an. Orlando ho aitonka buka dollar tanba osan maka bele kompleta moris, no osan maka família moris iha feliz. (Arif)

Matadalan