F-FDTL HO PNTL TENKE DISIPLINA

Eis Sekretario Estadu Defesa, Julio Tomas Pinto hatete membru Falintil – Forsa Defesa Timor Leste (F-FDTL) ho Polisia Nasional Timor Leste (PNTL) tenke disiplina no labele lori uniforme Estadu nian hodi hatauk povu.

“Ita nia forsas armadas ho polisia tenke disiplina makas, respeitu ita nia povu, ita nia sosiadade kumpri regras empeneamentu ne’ebé implementa labele abuza uniforme ne’e sasan Estadu nian,” dehan, Julio Tomas Pinto ba jornalista sira iha Hotel Timor, Sesta (12/02).

Nia hatutan, ida ne’e mak oras ne’e dadauk Instituisaun rua esforsu halao hela, importante liu ba F-FDTL komando kontrolu tenke forte.

“Komando tenke kontrola forte signifika komando tenke makas, hirarkia estrutura sira tenke makas, e oinsa kontrola ninia forsa armadas sira, ho disiplina bele lao diak,” Nia hatuir.

Alende ne’e, tuir nia haree dezemvolvimentu rekursu umanus iha Instituisaun F-FDTL agora lao diak no tenke mantein.

“Ita nia ministru esforsu makas para bele dezemvolve forsa ne’e sai professional tanba, ema bele troka programa nafatin, ita iha konsensus ida oinsa profesionaliza ita nia forsa armadas.” Nia dehan.

Nia parte mos promote kontinua fo suporta hamutuk ho Ministru no hirarkia F-FDTL para buat hotu bele lao diak e nasaun bele hetan seguransa diak no povu hakarak dezemvolvimentu lao.

Nia mos hatete, oras ne’e dadauk situasaun pais lao kalma, tanba kordenasaun entre ministerial ba asuntu seguransa nian lao diak no kordenasaun komando F-FDTL ho PNTL lao diak.

Iha opurtunnidade ne’e, nia mos mensiona katak oras ne’e dadauk Governu koalia ona konaba konseitu stratejiku defesa seguransa nasional, koalia mos konaba konseitu autoridade nasional maritima ne’ebé integradu.

Nune’e nia espera katak tó iha tinan 2017 buat hotu bele atinji ona no buat hotu sei lao normal.eus

Jornal Nacional