KonselIu Imprensa Harii iha Tronton Polítika Nia Leten

Primeiru Prezidente  Eleitu Konsellu Imprensa (KI) Timor-Leste, Virgílio Guterres hateten Konsellu Imprensa oras ne’e dau-daun harii iha tronton polítika no Bisnia nia leten, tanba ne’e sai hanesan todan ida ba KI iha futuru.

“Konsellu Imprensa hanesan ponte ida, agora buat boot rua (2) maka sei liu hanesan tronton polítika no kontiner bisnis, ne’e todan atu liu,” Prezidente Eleitu KI, Virgílio Guterres hato’o kestaun ne’e iha na kna’ar fatin, Faról, Díli, Sesta (01/04/2016).

Virgílio dehan tronton polítika no bisnis ne’e sai hanesan todan ida ne’ebé KI sei infrenta tanba iha futuru tanba sei sai mediadór ba polítku no bisnis sira ne’ebé iha poder polítiku no ekonómiku.

Nia esplika hola papél rua (2) importante maka hanesan advogador ba liberdade imprensa no liberdade espresaun no papél hanesan mediadór karik mosu disputa ruma hosi públiku ba mídia ou jornalista entaun KI sei sai mediador ba disputa hirak ne’e.

Hatán kona-ba situasaun polítika ohin loron iha TL mosu intervensaun oi-oin ba orgaun independente sira. Virgílio dehan “situasaun polítika ohin loron halo serbisu KI la Kamaan. Ami na’in lima (5) iha hela lafaek hamlaha aman boot nia kotuk, ami nia serbisu oinsá maka orienta lafaek ne’e labele tata ema”.

Nia dehan sé sira na’in lima (5) maka sala fó atensaun maka lafaek ne’e bele tata fali sira na’in lima (5), tanba ne’e sira nia papél maka oinsá atu hakilar ba ema hotu katak iha lafaek, liu-liu ba Jornalista sira atu halo serbisu ho Kódigu Étika Jornalizmu ninian atu nune’e lafaek labele tata.

KI koko nafatin atu komunika ho polítiku sira atu bele entende katak papél mídia nian ne’e importante, liu-liu públiku presiza hatene katak jornalista halo parte iha prosesu tomak “katak kriji ruma ita mosu halo parte iha kriji ne’e. la’os povu ezije sira dehan la’os maromak labele halo milagre maibé iha momentu ruma sira ezije jornalista sai anju”.

Virgílio esplika katak polítiku sira sempre konsidera katak jornalista sai ameasa ba sira nia poder tanba ne’e sira sempre buka abrigu ida ne’ebé metin atu defende sira nia poder tanba ne’e iha prosesu ruma maka polítiku sira hare lei Komunikasaun Sosial ladun defende sira di’ak entaun sira la uja ida, sira uja fali lei prosesu kódigu penal.

Depois de eleitu sai Primeiru Prezidente KI, iha tempu badak sei hetan tomada de pose hosi parlamentu nasionál nune’e bele hahú halo serbisu importante dahuluk hanesan estabelese sekretáriadu, kria rejimentu interna, format halo mediasaun, nst.

Saída maka ita boot sente bainhira simu kna’ar? Ho hamnasa Virgílio espresa “iha mundu jornalizmu ne’e iha buat ida ha’u difisil tebes atu hatete lae, tanba buat ne’ebé ita halo ho fuan entaun laiha buat ida lae iha ita nia moris”.

“Ne’e pozisaun todan maibé orgullu mós tanba espasu ruma ne’ebé ha’u hetan atu bele kontribui ba hadia liberdade imprensa ho liberdade espresaun. Ha’u mós fiar katak laiha buat rua ne’e ita ko’alia demokrasia ne’e hanesan ita mehi,” Virgílio salient.

Oras ne’e daudaun Virgílio Guterres tutela hela director iha ONG haburas maibé ne’e sei la implika ba serbisu KI nian tanba sei estabele sekretáriadu KI nian maka sei halo serbisu tomak, Prezidente KI ho estrutura sei deside de’it serbisu polítiku balun no mediasaun ba kazu ruma.

Oras ne’e daudaun Sekretáriu Estadu Komunikasaun Sosial mós aloka ona orsamentu Annual ho montante $985.559.420.47 dolares atu ezekuta ba tinan 2016 ninian. (Efrem)

Matadalan