PRADET Konstrui Tan Uma Hakmatek Iha Baucau

Diretor Ezekutivu  organizasaun Psychosocial  Recovery And Development in East Timor (PRADET), Manuel dos Santos, hateten iha tinan ne’e (2016) Pradet sei konstrui tan uma  hakmatek iha munisipiu Baucau hodi halo atendementu ba sira ne’ebe sai vitima husi violensia oin-oin ne’ebe iha.

Nia hateten, uma hakmatek ne’e sei lokaliza iha Ospital Referal Baucau (ORB), no nia area kobertura sei kobre vitima sira iha Baucau rasik, husi munisipiu Lospalos inklui Viqueque.

“Ita atu halo atendementu ba maluk sira ne’ebe hasoru turturasaun ba aktu violensia domestika, violensia seksual no abuzu ba labarik sira, e presiza iha fatin tanba atu atende ema ho situasaun hanesan ne’e presiza tempu no kondisaun ne’ebe hakmatek,” Diretor Ezekutivu PRADET Santos hateten, iha Dili.

Tanba ne’e, nia dehan, uma hakmatek ne’e sei hafasil tebes servisu ofisiais sira hodi fo atendementu ba kliente ne’ebe afetadu ba turturasaun violensia.

“Espera bele harii ho lalais iha tinan ida ne’e,” nia esperansa.

Alende ne’e,  nia hateten, PRADET mos konsege estabelese ona uma hakmatek iha munisipiu Dili, Oe-Cusse iha tinan 2002 inklui  iha Suai ho Maliana iha 2013.

Enkuantu orsamentu ba planu ida ne’e, nia dehan, hamutuk $90.900  apoia husi governu Japaun liu husi Embaixada Japaun iha Timor-Leste.

Iha parte seluk reprezentante husi  Ministeriu Saude, Diretora Isabelita Leto Mau, hateten estabelesementu uma hakmatek  ne’e importante tebes, tanba atu fo asistensia no tratamentu ba vitima violensia domestika presiza duni fatin ne’ebe adekuadu.

Tanba durante ne’e, nia dehan, ORB mak oferese  kuartu ida iha sala maternidade ba PRADET hodi hala’o sira nia knar, maibe situasaun ida ne’e ladun favoravel, e dala barak vitima sempre kestiona kona ba sistema de atendementu.

“Ospital referal Baucau oferese tiha ona rai ba sira hodi harii uma hakmatek ne’e,” nia dehan.

Nia mos informa, katak desde tinan  2010, PRADET konsege fo ona formasaun medical forensic ba professional saude nain tolu hodi fo asistensia ba vitima sira, hafoin ida ne’e iha tinan 2014  kontinua oferese formasaun hanesan ba professional saude nain hat.

The Dili Weekly