PTT: Negosiasaun Fronteira Maritima labele involve-tan ema ne’ebé asina akordu

Dili, Radio Liberdade Online -    Partidu Trabalhista Timor (PTT) sujere prosesu negosiasaun fronteira maritima labele involve tan ema ne’ebé asina ona akordu iha 2002  tamba sira komete  ona krime, dehan Prezidente Partidu Trabalhista, Angela Freitas Liu-husi konfrensia da Imprensa iha sede partidu nian iha Bairo Formouza 13/4/16 .

“Hau tenke bolu individu tamba saida iha governu tranzisaun ne’e lahanesan governu defenativu tamba ne’e laiha báze legál ida atu asina akordu ida ne’ebe kobre futuru nasaun ninian.  e impaktu bot ida ba futuru nasaun ninian ne’ebe ema sira ne’ebé mak involve iha akordu ne’e komete krime tia ona. Ne’eduni negosiasaun ne’ebé mak nafatin involve ema sira ne’ebe mak asina ona MoU  ne’e sei  lahetan solusaun,” nia haktuir.

Prezidente partidu trabalhista ne’e realsa tan katak “ partidu trabalhista sadik Ministériu Públiku no Tribunal atu hasai surat kapturasaun ba indivudu sira ne’ebé mak asina akordu Fronteira maritima tamba ida ne’e inportante antes ita atu halo konsellu permanente no atu halo rede regosiasaun ba ronteira maritime.”

“importante-liu mak tenke kaptura individu ne’ebé mak involve asina akordu. Ita labele dehan taka matan ba ida ne’e ida ne’e futuru nasaun ninian korupsaun ne’e inpedimentu ba prosesu dezenvolvementu no ita nia nasaun sei ladezenvolve tamba ita nia rikusoin ema faan tiha ona,” nia sublina.

Angela Freitas esklare tan katak Partidu trabalhista lamenta tebes ba individu ne’ebé mak involve asina akordu ne’ebé mak deside inísiu  iha tinan 2002 ida-ne’e tenke esplika klaru ba povu no ukun nain sira labele subar ba públiku prosesu ne’ebé mak la’o tiha ona .

“ita atu protesta ba ita nia soberania ne’e kazu ida bo’ot tebes. Ne’e tenke involve matenek nain sira liuliu ema jusrista sira ne’e no politika sira para atu bele fó sira nia hanoin no tetu buat sira ne’e.”

“Tuir buat sira ne’ebé atu lori desizaun entre parte rua Australia ho Timor-Leste, dala barak ita mensióna katak ita hakarak obriga Australia para tu’ur iha meja  redonda para atu halo desizaun kona-ba fronteira maritima maibé husi parte ida ita seidauk preparadu ou ita seidauk hadi’ak ita nia uma laran .”

Sra. Angela hateten mós katak kuandu Timor –Leste kontinua nafatin ho sistema “Maun Bo’ot” ne’e Timor-Leste sei la la’o bá oin no sei marsa hela iha fatin  no Timor-Leste seidauk preparadu atu halo protesta hasoru  direitu fronteira maritima tamba Timor-Leste rasik iha problema uma laran ne’ebé barak mak seidauk resolve.

Rádio Liberdade Dili