Austrália defende apoiu ba funu iha Irake iha 2003 maski iha relatóriu britániku nian

Ministra Negósiu Estranjeiru australianu nian, Julie Bishop, defende iha loron-kinta ne'e partisipasaun hosi nia nasaun ba Funu Irake nian iha 2003, hafoin divulgasaun hosi relatóriu britániku ida ne'ebé kestiona motivu sira konflitu nian. 

Bishop hatete ba meiu komunikasaun sosial australianu sira katak desizaun ne'e foti ho baze iha informasaun disponível no nia fó hanoin katak hetan apoiu hosi áres polítiku oioin.

Deklarasaun sira hosi ministra mosu hafoin revelasaun iha loron-kuarta ba relatóriu hosi komisaun britániku ida ne'ebé refere katak invazaun iha Irake, ho argumentu dehan katak iha arma sira destruisaun masiva nian, avansa ona ho prova sira hosi servisu sekretu "ne'ebé la justifikadu" no la esgota opsaun pasífiku.

Bainhira hatán kona-ba karik John Howard, iha tempu ne'ebá nu'udar primeiru-ministru Austrália nian, tenki husu deskulpa ba povu australianu tanba desizaun, Bishop hatete katak ne'e hanesan desizaun pesoal ida maibé nia fó hanoin katak iha ona apoiu hosi opozisaun traballista.

"Ha'u sei hanoin ho di'ak katak Kevin Rudd [ne'ebé iha tempu ne'ebá hanesan porta-vós hosi Asuntu Esternu hosi traballista sira nian] insisti hodi mantén ami nia apoiu ba Estadus Unidus. Hanesan pozisaun bipartidu ida relasionadu ho Irake", Bishop hatete iha deklarasaun sira ne'ebé haktuir hosi ajénsia lokal AAP.

Iha loron 18 Marsu 2003, George W. Bush, ne'ebé iha tempu ne'ebá nu'udar Prezidente EUA nian, husu formalmente ba Howard hodi partisipa iha intervensaun militar ida iha Irake, ne'ebé materializa ona hodi haruka soldadu na'in 2.000 resin.

Relatóriu hosi komisaun Chilcot kritika maka'as desizaun sira ne'ebé foti hosi eis-primeiru-ministru traballista britániku nian, Tony Blair, relasionadu ho funu iha Irake, ne'ebé mate ona soldadu britániku na'in 179 no ema irakianu millaun resin.

Alegadu pose arma sira destruisaun masisa nian hosi rejimi irakianu, nunka komprovadu, hanesan justifikasaun prinsipal ba partisipasaun hosi Reinu Unidu nian iha invazaun Irake nian, iha fulan-Marsu 2003, bainhira Tony Blair lidera governu britániku.

Chilcot, komisaun ne'ebé harii iha tinan hitu liubá hodi peskiza kontornu sira hosi envolvimentu britániku nian iha konflitu, konklui ona katak "Reinu Unidu partisipa mós iha invazaun Irake nian antes esforsa iha opsaun pasífiku sira ba dezarmamentu".

"Iha tempu ne'ebá, asaun militar la'ós hanesan rekursu ikus", hatete hosi prezidente komisaun nian John Chilcot.

Tony Blair reaje ona ba relatóriu, hodi hatete "pena, arependimentu no kulpa". Maibé, nia afirma ona katak la lohi Parlamentu no la lamenta afastamentu hosi antigu líder irakianu Saddam Hussein.

"Ha'u senti triste liu, arepende no senti sala kona-ba buat ne'ebé maka imi sei bele hatene ka fiar", nia afirma.

Maibé, nia hatutan ona, "hanesan relatóriu husik klaru, laiha bosok sira, la lohi Parlamentu no Governu, laiha kompromisu sekretu ida ho [desizaun] funu nian".

Ho kareira naruk ida nu'udar diplomate, hafoin sai tiha nu'udar konselleiru hosi serbisu sekretu sira Reinu Unidu nian, John Chilcot, ho tinan 77, sai hanesan naran ne'ebé hili hodi lidera no organiza komisaun ida ne'ebé iha misaun hodi avalia knaar britániku nian iha funu Irake nian, hahú hosi loron invazaun nian iha fulan-Marsu 2003 to'o loron ida ne'ebé hasai tropa britániku sira iha fulan-Maiu 2009.

Inkéritu ne'e anunsia iha fulan-Juñu 2009 hosi primeiru-ministru iha momentu ne'ebá, Gordon Brown (2007-2010), ne'ebé hosi mós partidu traballista.

SAPO TL ho Lusa - Foto: Nikki Short/EPA