KOLHETA IKAN IHA DOLOK OAN, PR TAUR: TIMOR-OAN ISIN BO’OT KAKUTAK KI’IK

Prezidenti Repúblika (PR), Taur Matan Ruak, Sabadu (16/07), kolheta ikan iha Dolok Oan, ne’ebé hakiak husi Kompañia Baniuaga Marikultura.

Hafoin koeleta tiha ikan, PR Taur Matan Ruak hatete katak, ema husi nasaun seluk hatete katak, Timor-oan sira isin bo’ot maibé kakutak ki’ik, tanba ladun konsumu ikan.

“Ita Timor  han ikan ladun, tanba ne’e mak malae sira dehan, isin mak bo’ot, kakutak ki’ik, entaun ita tenki han ikan maka’as para, kakutak mak bo’ot, isin ki’ik,” dehan Taur Matan Ruak ba jornalista sira, hafoin koeleta ikan.

PR Taur Matan Ruak hatutan, nia kontenti tebes, tanba bele iha Timor-oan ida ne’ebé iha inisiativa di’ak ba nia nasaun rasik.

“Iha ema nia rain, nia ikan tau hela iha vidru laran, ita ba haree sira foti sai mai mak tein. Ita nian iha ne’e mate tiha mak ita han, entaun ohin ha’u haree ita nia ikan moris hela, ha’u kontenti los, afinal ita nia labarik sira mós bele halo,” katak Xefi Estadu ne’e.

Taur Matan Ruak espera katak, aban bain rua iha restorante sira, la’os ona ikan mate tiha ona mak tein hodi fó ema han, maibé moris hela ema ba hatudu mak foin hasai hodi tein fó ba ema han.

Xefi Estadu ne’e dehan, atividade ne’e la fasil, maibé nia espera katak, emprezariu Timor-oan sira seluk bele halo tuir atividade ne’e, hanesan mós Timor-oan ida ne’ebé hala’o atividade ne’e iha Metinaro.

Alende ne’e, eis Prezidenti Repúblika, José Ramos Horta mós hatete katak, tuir nia haree, kompañia Baniuaga Marikultura komesa bo’ot ba bebeik, no f’o ona servisu ba Timor-oan ema rihun tolu.

“Projetu hakiak ikan ne’e, di’ak tebes, ne-neik sei sai bo’ot liu tan, primeiru ba merkadu internu, depois husi liur mós bele hetan. Atividade ida ne’e di’ak, tanba la estraga ita nia ikan, iha rai barak roo ahi bot sira mai foti tiha ikan hotu, ikan laiha,” katak Ramos Horta.

Iha fatin hanesan, Diretur ezekutivu kompañia Baniuaga Marikultura, Eduardo Soares Belo ‘Gatot’  mós hatete katak, eventu koeleta ikan ne’e, hanesan motivasaun ida, atu fó korazen ba maluk sira seluk, se karik hakarak bok an iha área negosiu peska ninian.

Nia hatutan, projetu hakiak ikan ne’e, sira foin hahú ho projetu pilotu ne’ebé hahú iha fulan hira liu ba.

“Ikan ne’ebé mak ami haki’ak agora dada’uk ne’e, iha 9000 etal peses, ida ne’e sura ho ita nia ema iha Dili laran ne’e, barak liu tiha 9000 ne’e, agora halo nusa mak, ita nia ema sira ne’e, lor-loron bele han nafatin ikan fresku,” relata Gatot.

Tanba ne’e, Gatot dehan, agora dada’uk sira tenta hela atu aumenta diveirus, para komunidade sira iha Dili laran bele han ikan fresku lor-loron.

“Prosesu hakiak ne’e, ikan oan ita importa husi Indonesia mak mai, nia hahan mós ita importa husi Indonesia,” tenik nia.

Ikan ne’ebé mak kompañia Baniuaga Marikultura hakiak iha Dolok Oan ne’e mak hanesan, goropa ka garapu Tikus no ikan batik. Ikan ne’e, tinan ida sira bele koeleta fulan-fulan, depende ba sosa nain sira.cos

Jornal Nacional