Iha 29 kriterius AFC nian mak hatodan Clubes sira tuir AFC Cup

Dili, Haksesuk Bola (HB).  Clubes sira iha Liga Futebol Amadora (LFA) nian atu tuir kompetisaun Clubes iha AFC (Asia Confederation Futebol ) nian precisa kumpri kriterias sira ne´ebe AFC estabelese.

Haktuir Sekretariu Jeral Federasaun Futebol Timor-Leste (FFTL)  Amandio de Araujo Sarmento ba Haksesuk Bola iha nia knar fatin Sexta-feira (05/08/2016), “Clubes sira hola parte kompetisaun LFA atu partisipa iha  kompetisaun iha nivel AFC tenki kumpri 29 kriterius ne´ebe AFC estabelese ona”.

Tenik tan Amandio de Araujo Sarmento, “minimu tenki kumpri kriteriu 10, nuné bele tuir kompetisaun nivel Clubes AFC nian”.

Hatutan Amandio de Araujo Sarmento, “FFTL hamutuk ho AFC mos iha fulan Abril tinan 2016, konvida Clubes principal LFA nian tuir  encontro  hodi brief ba clubes sira konaba kriterius sira AFC nian. Clubes sira tuir mak SLB, Karketu Dili FC, Académica, As Ponta Leste, Aitana FC no café”.   “Clubes sira iha LFA precisa inteira ho situasaun no kriterias AFC nian”, defende Amandio de Araujo Sarmento.

Minimu kriterius 10 mak Clubes sira iha, nune´e bele hola parte iha kompetisaun mak:

Iha office permenante;

Manajement ka jestaun Clubes permanente;

Clubes tenki iha estrutura ba formasaun iha kategoria jovens husi U sub-14 –sub-21;

Estrutura teknikas Clubes nian no treinador principal ho certifikadu A;

Programa ba desenvolvimentu financeiras;

Iha kampu permanente no kampu treinu. Kampu principal ho kadeiras 25-45 mil kadeiras; kadeira individual.

Iha Diretor ba Marketing rasik;

Rejistu tuir Lei ne´ebe vigora iha Nasaun ida-idak nian;

Iha team Legal advisor;

Kada clubes tenki iha jogador ou foreign players minimu 5 ho salario minimu 10 mil USD ba leten kada fulan;

Kada clubes tenki iha bank garansi minimu 1 to´o 5 miliaun USD nee depende ba nivel ou kategoria clube sira, nomos kompetisaun nivel ida nebe mak sira atu partisipa;

Kampu ka stadium ho kapasidade lampu min 1.200 Lux e Maximu 1.500 Lux;

Clubes sira, liliu Sporting, Laulara & Benfica (SLB) prontu ba tuir kompetisaun AFC Clubes nian, haktuir sekretariu Jeral SLB, Domingos Caeiro ba Haksesuk Bola Quinta-feira (04/08/2016), ´´ SLB prontu ba tuir kompetisaun AFC Club´´, hare mos Haksesuk Bola Online (1).

Hatan ba ida ne´e, Amandio de Araujo sarmento hakturi katak, “Clubes sira ne´ebe iha kondisaun minima bele turi kompetisaun nivel AFC nian”. Argumenta Amandio de Araujo Sarmento, “Clubes sira la iha kampu rasik, Clubes SLB ho Karketu Dili bele host iha kampu Estadiu Municipal Dili, ne´e tenki kontratu ona Governo liu SEJD ne´ebe jere kampu ne´e rasik”.

Entre Clubes sira iha Primeira Divisaun LFA, Clubes ne´ebe mak bele prenxe kriterius sanulu resin minimu atu nune bele tuir kompetisaun iha AFC CUP!

Haksesuk Bola 2016

Foto: Dok.FFTL!

Referensia:

SLB prontu ba tuir kompetisaun AFC CUP