Guterres Sei La Interven iha Disputa Fronteira Maritima

DILI - Relasiona ho Problema disputa Fronteira Marítima (FM), Premiadu Nobel ba Pás, Jose Ramos Horta hatete, Sekretáriu Jeral Nasoens Unidus António Guterres ne’ebé foin eleitu hosi Konsellu Seguransa sei latama ka la interven tan, ba problema Fronteira Marítima, tanba prosesu la’o tiha ona.

“Sekretáriu Jeral Organijasaun Nasoens Unidas (ONU) sei latama iha problema fronteira maritima ne’e. La presiza sekretáriu Jeral atu tama iha laran hotu tanba iha mekanismu ONU rasik maka ne’e no karta rua ne’e simu tiha ona no hahú ona prosesu ne’e iha Olanda agora iha singapura, tanba ne’e ha’u hanoin sei hetan solusaun iha tempu badak nia laran” eis Prezidente Repúblika José Ramos Horta hatete ba jornalista sira iha Konferénsia Internasionál ba selebrasaun tinan 20 ba nobel ba pás iha Palasio Prezidensial Bairro Pite Dili, (7/10).

Maibé amigo eis Primeiru Ministru ne’e kontente, tanba António ema ida di’ak no nia sei di’ak ba ONU no ba mundu tomak, maibé la’ós deit ba Timor Leste hanesan nasaun amigo hosi Portugál.

Maske iha buat balun presiza tulun malu, maibé kona-ba problema fronteira marítima ho Austrália, Sekretáriu Jeral ONU, tenke hatudu ninia imparsialidade.

Tanba problema refere ONU rasik simu ona no hosi audensia primeiru ne’ebé mak hala’o iha Ollanda, Tribunál internasional rekoñese Timor Leste nia karta konsialiasaun obrigatoriu, hodi nune’e kontinua prosesu disputa ba oin.(Mj1)

Timor Post