Portugés Barak Ajuda Povu Timór Luta Ba Independensia

DILI, (ANTIL) -  Prezidente Repúblika, Taur Matan Ruak, hateten, ema Portugés barak fó sira-nia luta hodi ajuda povu Timór –Leste to’o hetan Independensia totál.

“Imi-nia solidariedade ne’e solidariedade ida mai hosi imi-nia fuan, ba povu Timor. Ema Portugés barak fó sira-nia luta ba povu Timór, hanesan sira nia luta rasik,” Prezidente Repúblika (PR), Taur Matan Ruak hateten ida-ne’e iha Portugal, Sesta (8/11), bainhira kondekora “Grande Colar da Ordem Timor-Leste” ba Prezidente antigu Portugés na’in rua, Mário Soares no Jorge Sampaio, nu’udár sinal rekuñesimentu ne’ebé sinseru ba solidariedade no apoiu ativu iha luta ba Timor-Leste nia independénsia.

PR Taur entrega kondekorasaun refere ba antigu Prezidente Jorge Sampaio, no mós ba Eis-Xefe Estadu, Mario Soares atraves nia oan mane, João Soares.

Prezidente Taur hateten, povu Portugés ativa tebe-tebes iha rezisténsia, ajuda refujiadu Timor-oan sira, liu-liu sira ne’ebé exilados. Iha kazu barak, hala’o papél importante iha divulgasaun no promosaun ba kauza Timor-Leste.”

Alende “Grande Colar da Ordem Timor-Leste” , Xefe Estadu mós entrega “Medalla Ordem Timor-Leste” ba Majór-jenerál Arnaldo José Ribeiro da Cruz,  Sra. Pascoela Barreto dos Santos, Arnold S. Kohen, Carlos Eduardo de Medeiros Gaspar, no Amílcar Rodrigues. Fó mós kondekora títulu póstumu ho insígnia hosi “Ordem Timor-Leste” ba Timoroan iha diaspora ne’ebé iha tempu okupasaun fó apoiu maka’as ba luta autodeterminasaun Timor-Leste nian.

Iha parte seluk,  Prezidente Repúblika, Taur Matan Ruak  hato’o rekuñesimentu sinseru hosi sentimentu humanu ba espresaun solidariedade no apoiu ativu, ne’ebé eis Prezidente na’in rua ne’e  halo durante tinan barak nia laran, atraves sira-nia esforsu determinadu hodi lori prosesu, luta ba Timor-Leste nia independensia ba oin.

“Sira na’in rua kontribui fundamentál ba ezisténsia Timor-Leste livre no ba amizade fraternál, entre Timoroan no Portugés,” Xefe Estadu hateten, hanesan  liuhusi komunikadu imprensa hosi Mídia Palásiu Prezidénsia Repúblika ne’ebé ANTIL asesu iha Sesta (04/11).

Prezidente Repúblika mós hato’o ninia satisfasaun ba Señor António Guterres, ne’ebé maka eleitu ona nu’udar Sekretáriu-Jerál ba Organizasaun Nasoens Unidas. Nune’e Xefe Estadu hatutan nia deskursu hodi hateten, “Ne’e nu’udar vitória ba ema hotu-hotu, Estadu membru ONU nian, no ba ita nia membru sira, maibé liliu ba povu Portugés, ba Timor-oan sira, no ba CPLP (Comunidade dos Países de Língua Portuguesa) no ema hotu-hotu ne’ebé mak funu buka ba paz no justisa”.

Ikus liu, Xefe Estadu agradese ba “Portugal no portugés sira hotu, ba sira ninia sentimentu solidariedade iha tempu uluk no mós iha agora ida ne’e.

Seremónia refere hala’o iha Hotel Tivoli, Lisboa, Premiadu Nobel da Páz, Don Carlos Filipe Ximenes Belo mós partisipa, inklui eis Vigáriu Jerál Dioseze Díli, Padre Apolinário, Prezidente Asembleia Repúblika Portugal nian, Eduardo Ferro Rodrigues, Ministru Negósius Estranjeirus no Kooperasaun, Hernaâni Coelho, Embaixadora Timor-Leste iha Portugal, Maria Paixão, família kondekoradus hamutuk ho timoroan sira ne’ebé hela iha Portugal. (Jornalista: Xisto Freitas/Editór: Otelio Ote)