Seguransa 28 Novembru, Taur Halao Enkontru Lideransa Defeza-Seguransa

DILI - Atu fo seguransa ba Komemorasaun loron proklamasaun Independesia 28 Novembru neebe sei haao iha Munisipiu Lautem, lideransa Defeza no Seguransa halao enkontru ho Prezidente Republika Taur Matan Ruak.

Lideransa Defeza no Seguransa neebe mak halao enkontru ho Prezidente Republika Taur Matan Ruak mak hanesan Maijor Jeneral Falintil Forsa Defeza Timor Leste, Maior Jeneral Lere Anan Timur, Ministru Defeza Cirilo Cristovao no Ministru Interior Longuinhos Monteiro.

Remata enkontru Maior Jeneral Lere Anan Timur hatete enkontru ho prezidente Republika koalia barak liu aktividade militar nian no mos situasaun seguransa iha rai laran.

Hau mos informa ba prezidente kona ba aktividade 28 novembru no asuntu seluk tan,  seremonia nee sei halao iha munisipiu Lautem, neebe presiza hare kondisaun hanesan Estrada tenki diak,” dehan Lere ba Jornalista Kinta (17/11/2016) iha Palasiu Prezidensial Nicolao Lobato.

Nia hatete atu komemora loron nee, governu tenki hadia estrada diak tamba ema barak mak sei ba iha Lautem, tamba estrada ba iha neeba antes nee kuak lori oras nebe mak barak.

Iha fatin hanesan Ministru Interior Longuinhos Monteiro hatete nia parte hamutuk ho Ministru Defeza halao enkontru ho Prezidente Republika, aprezenta situasaun seguransa interna no dezenvolvimentu iha forsa armada. Informasaun kompletu iha STL Jornal no STL Web, edisaun Sesta (18/11/2016). Timotio Gusmao

Suara Timor Lorosae