FERIAS UZA PATRIMONIA ESTADU, NEE KRIME…!!!

Jornal Nacional, editorial

Polisia Nasional Timor Leste foin lalais halo ona ekontru ho Komisaun Anti Korupsaun (KAK) hodi koalia konaba oinsa polisia atu kontrola patrimonia Estadu nian nebe Funsionariu Públiku uza iha tempo ferias nia laran.

Nudar parte husi implementasaun komprimisu entre insitituisaun Polisia ho Komisaun Anti Korupsaun, mak Komando Polisia fo ona orientasaun ba membru sira atu kontrola movimentu veiklu estadu nian iha tempo ferias.

Polisia Nasional Timor Leste (PNTL) deklara abertamente ba publiku katak polisia sei la tolera tan ona Funsionariu Públiku sira nebe uza patrimonio Estadu nian iha tempo ferias nia laran.

Agora kestaun mak polisia mos tenki iha base legal. Funsionariu Publiku sira nebe kontinua lori patrimonia Estadu nian depois polisia kaptura nee kontra lei saida, artigu hira no ninia sansaun ka kastigu nee saida? Nee tenki klaru.

“ami ekontru ona ho sira husi KAK nian nebe ami deside katak apartir ohin ba oin mak ami kaptura tan kareta Estadu ka Governu laiha ona toleransia no la aplika ona sansaun ifraksaun ba sira, ami blika ona krime pekulatu ka krimi dezobidensia no bainhira ami kaer karet Estadu, governu iha dalan fora servisu mak sira uza, ami kaer detein kedas” Pedro Belo.

Los duni senhor, Polisia tenki maximaliza kontrolu veiklu Estadu nian nebe Funsionariu Publiku sira uza iha tempo ferias. Tamba Funsionariu Públiku ba uza kareta Estadu nian nee ba intrese privadu.

Iha loron Sabado no Domingo, Kareta Estadu nian nee lori ba festa kazamentu, lori ba pasiar iha tasi ibun no balu uza fali tula sasan halo negosiu no mos tula familia pasiar nebe tuir lolos labele akontese.

Laiha duvida katak uza fasilidade Estadu laos iha tempo servisu nian no servisu laos ba intrese Estadu nian nee tenki kriminaliza tamba uza sasan Estadu nian laos ba nesesidade Estadu nian nee Korupsaun mos tan nee KAK tenki kontrola duni.

Nunee mos Kooperasaun entre Polisia no KAK nee pertenente duni tamba la kleur tan ferias ba loron boot Natal no selebrasaun simu Tinan foun nian tan nee polisia tenki kontrola duni patrimonia Estadu nian ho didiak atu labele uza arbiru.

Durante nee Estadu gasta osan milloens dollar amerikanu ba kombustivel, manutensaun patrimonia Estadu nian tan nee KAK ho Polisia bele servisu hamutuk hodi kombate ema sira nebe uza fasilidade ka patrimoniau Estadu nian arbiru deit.

Pior liu tan mak Funsionariu Publiku balu uza sasan Estadu nian la senti hanesan nain, lasente partense, uza kareta Estadu la kuida ho didiak, soke tun soke sae nebe ikus mai Estadu mak tenki   gasta osan halo manutensaun.

Agora, Polisia nudar autoridade seguransa, parseiru KAK nian hodi kombate Korupsaun, labele fo fatin ba koruptor sira halo korupsaun. “Labele uza kesempara dalam kesempitan”, puro kontrola.

Polisia ninia kontribuisaun ba kombate Korupsaun importante tebes, li-liu maneira sira hanesan nee kontribui ba hamenus Korupsaun iha Timor Leste. Polisia tenki komitmentu forte hodi kombate, iha ambitu Funsionariu Publiku sira nebe laiha nosaun partense, la kuidadu sansan Estadu nian.

Susesu Polisia nian ba kontrola sirkulasaun veiklu Estadu nian sei hakmanan despeza Estadu nian ba mina no manutensaun ba patrimonio Estadu nian sira. susesu polisia nian mak susesu Estadu nian ba hamenus Korupsaun iha rai doben ida nee.*

Jornal Nacional

Lee iha Timor Agora

PNTL SEI LA TOLERA FP UZA PATRIMONIO ESTADO IHA FERIAS