Austrália husu ba Xina hodi labele fornese kombustível ba Koreia-Norte

Primeiru-ministru australianu, Malcolm Turnbull, insisti iha loron-kinta ne'e ba Xina hodi labele fornese kombustível ba Koreia-Norte hodi trava aumentu tensaun ne'ebé provoka hosi ensaiu nuklear sira no misil balístiku hosi Pyongyang.

"Sira [Xina] kompromete hodi husik sosa anar, besi, marisku ho produtu sira seluk norte-koreanu nian. Bele aumenta tan kastigu no hapara abastesimentu kombustível nian, hanesan ezemplu", afirma hosi Malcom Turnbull ba rádio lokal 2SM.

"Bainhira ko'a sira nia fonte reseita no asesu ba enerjia, rejimi sei labele moris no nune'e maka Xina tenki halo", primeiru-ministru australianu insisti no defende ona "izolamentu total" Pyongyang nian.

Canberra defende ona aplikasaun hosi kastigu foun sira - no ida ne'ebé todan liu to'o ohin loron - hasoru Koreia-Norte, iha inísiu fulan ne'e, hosi Konsellu Seguransa ONU nian, ho apoiu hosi Xina, tanba lansamentu hosi misil sira.

Lansamentu ne'ebé Koreia-Norte halo foin lalais ne'e - dala 13 dezde inísiu tinan ne'e - halo iha loron-kuarta no, ba dala uluk dezde 2009 maka semo iha Japaun.

Primeiru-ministru australianu hatutan katak bainhira Koreia-Norte ataka Estadus Unidus - tanba Pyongyang renova beibeik ameasa hasoru illa Guam, iha Pasífiku, ne'ebé iha baze militar importante sira norte-amerikanu nian - maka hahú ona konflitu ida ne'ebé konstitui hanesan "billete suisidu ida" ba Koreia-Norte nian.

Ba Turnbull, líder norte-koreanu, Kim Jong-un, ho administrasaun hosi rejimi Pyongyang nian iha reasaun hanesan "merkador sira" ka "mafiozu sira" no iha realidade "hakarak halo tauk nasaun sira seluk" tanba osan no "vantajen ekonómiku sira".

Tanba ne'e, dirijente australianu insisti katak "tenki fó tan kastigu sira" hodi hatudu katak "sira nia tátika sei la hetan prémiu sira".

SAPO TL ho Lusa