Ohin, TradeInvest Organiza Premiu Exportasaun 2017

DILI, (TATOLI) – Ajensia Governu ba promosaun investimentu no exportasaun, TradeInvest Timor-Leste (TITL), ohin, organiza “Premiu Exportasaun 2017” ba dahuluk nian iha Timor Plaza, Dili.

Eventu nasionál ba dahuluk ne’e dezeñu hodi rekoñese no enkoraja esforsu setór privadu nasionál (liu-liu emprezas ki’ik no mediu) hodi kontribui ba dezenvolvimentu sosiál no ekonomia rai-laran.

Liuhosi komunikadu, Ministru Estadu no Ministru Agrikultura, Estanislau Aleixo da Silva hateten setór privadu iha kna’ar ne’ebé importante tebes ba dezenvolvimentu ekonómiku tanba ajuda Nasaun diversifika ekonomia no loke oportunidade servisu ba foin sae sira.

Tanba ne’e Governu iha kompromisiu atu promove no apoiu. Hodi hatutan, eventu ne’e hanesan parte ida hodi promove setór privadu no enkoraja atu kontinua halo investimentu no kontribui ba dezenvolvimentu ekonomia.

Diretur Ezekutivu TITL, Arcanjo da Silva hatutan, eventu ne’e hanesan parte atividade ne’ebé haktuir ona Planu Asaun Anuál 2017 no sei sai hanesan eventu anuál ba TITL hodi promove investimentu no exportasaun iha Timor-Leste.

Premiu exportasaun hanesan oportunidade di’ak atu rekoñese servisu maka’as husi exportadores (eziste no potensiál) sira hodi haburas liu tan sira nia negosiu iha merkadu domestiku no internasionál.

Eventu ida ne’e sei partisipa hosi instituisaun Governu relevante ne’ebé halao kna’ar ba promosaun investimentu no exportasaun, setór privadu (nasionál no internasionál), reprezentante husi Camara Comersio no Industria Timor-Leste (CCI-TL) no reprezentante husi parseiru dezenvolvimentu.

Telemor no Timor Plaza Hotel no Apartments mak sai hanesan sponsór prinsipál ba eventu ne’e. (ki)