Kompania Balun Abandona Projetu Estrada

DILI – Povu presiza dezenvolvementu infraestrutura neebe diak no kualidade, maibe tanba lakon kontrola husi governu mak kompania balun abandona projetu hanesan loke estrada iha Postu Administrativa Tilomar, Munisipiu Covalima.

Tuir Reprezentante Povu iha uma fukun Parlamentu Nasional Deputadu, Alexandrino Cardoso, governu ladun tau importansia hodi kontrola obra neebe mak iha baze, ho kestaun nee kompania balun gosta abandona projetu neebe sira kaer hanesan loke luan Estrada iha Munisipiu Covalima, Postu Administrativu Tilomar Suku Lalawa, liga mai too iha Postu Zumalai.

Hau hakarak hatoo ba Parlamentu konaba kestaun projetu loke estrada iha Covalima Postu Tilomar nian, nee sai Problema boot ba povu tanba kompania neebe kaer obra nee abandona total projetu nee no agora udan mos besik monu rai ona,” Kestaun nee fo sai husi Deputadu Alexsandrino liu husi Sesaun Plenaria, Segunda (02/10/2017) iha PN.

Nia hatutan, projetu nee hahu iha tinan rua liu ba maibe too agora laiha kontinuasaun no kompania neebe kaer obra nee mos agora lakon los no la iha responsabiliza ba ida nee. Tan nee husu nafatin ba governu atu toma medidas ba kompania refere, oinsa bele finaliza lalais obra sira nee. Tanba projetu nee lao kleur tiha ona.

Tuir Deputadu nee katak, orsamentu neebe fakar ba projetu nee laos orsamentu privadu maibe, nee orsamentu povu nian, tan nee hakarak ka lakohi povu tenke sente dezenvolvementu laos halo povu sai nafatin vitima ba dezenvolvementu.

Iha fatin hanesan Deputadu Domingos de Carvalho mos hatutan, problema kompania abandona projetu nee, laos akontese iha Suai deit maibe iha fatin balun mos iha, tanba nee husu nafatin ba governu atu bolu kompania neebe kaer obra nee atu fo deklarasaun lolos tanba saida maka abandona obras nee.

“Hau hanoin governu ho kompania tenke buka dalan hodi rezolve tanba saida maka, akontese hanesan nee, dala ruma kompania nee seidauk hetan pagamentu tanba nee orsamentu la iha atu finaliza obra nee, maibe atu hatene informasaun neebe los maka knar governu nian tenke bolu kompania nee mai, fo deklarasaun lolos,”informa nia. 

Madalena Horta | Suara Timor Lorosae