PM: Orsamentu retifikativu timoroan sei besik dolar millaun 211 resin

Primeiru-ministru timoroan hatete, iha loron-sesta, katak Orsamentu Retifikativu sei kontempla aumentu ida besik dolar millaun 211 resin iha konta sira tinan ne'e nian hodi selu projetu deklaradu sira iha fulan hirak ikus ne'e hosi ezekutivu anterior.

"Retifikativu inklui tusan sira ne'ebé maka hetan iha fulan hirak dahuluk hosi semestre daruak tinan ne'e nian ho projetu deklaradu sira ho forma diretu ba empreza hamutuk 140 resin. Iha total hamutuk dolar millaun 211", Mari Alkatiri hatete iha deklarasaun sira ba Lusa iha Perth, Austrália.

"Ne'e tama ona iha Orsamentu Retifikativu. Antes selu, ami tenki sertifika katak obra sira halo ona ka la'e, katak kumpri ona buat hotu. Auditoria ida de'it maka bele fó sai mistériu hosi tansá maka fó kontratu barak iha ajuste diretu", nia refere.

Iha nível global, Alkatiri hatete ona katak estrutura sira hosi Governu foun imolika "poupansa ida lalais hosi dolar millaun 40" no garanti atu poupansa sei aumenta iha tinan oinmai "relasionadu ho disiplina hosi despeza sira".

"Iha Governu antigu estrutura ne'e uluk la ezisti no tanba ne'e maka presiza mudansa retifikativu ida hosi Governu. La'ós tanba primeiru-ministru, kargu ne'e hela nafatin, maski ha'u la simu buat ida. Ha'u hatete ona katak ha'u lakohi simu saláriu to'o situasaun sai loloos. Ha'u moris hela hosi ha'u nia pensaun", nia afirma.

Mari Alkatiri ko'alia ba Lusa iha Perth bainhira partisipa, entre loron-sesta no loron-domingu, iha Asia Pacific Regional Conference (APRC, ho sigla iha inglés) ne'ebé nia abertura ofisial sei hetan intervensaun hosi Alkatiri no hosi nia homólogu australianu, Malcolm Turnbull, no hosi prezidente alemaun Frank-Walter Steinmeier.

Durante vizita, Alkatiri sei halo mós enkontru bilateral sira ho prezidente alemaun, ho primeiru-ministru no ministru Finansa australianu, ho ministru Negósiu Estranjeiru Singapura nian no ho prezidente sira hosi Woodside Petroleum e da Conoco Philips, no seluk tan.

Alkatiri hatete katak negosiasaun sira entre Timor-Leste ho Austrália kona-ba fronteira tasi nian tuir loloos tenki refere iha enkontru ho Turnbull maibé sei la ko'alia kestaun konkretu sira.

"Ha'u fiar maka'as iha ekipa ne'ebé halo hela negosiasaun no ha'u lakohi interfere iha prosesu", nia hatete no afirma katak akordu entre nasaun rua hanesan "posivel" ho "nível ne'ebé aas tebes ba Timor-Leste".

Alkatiri halo ona negosiasaun ho Austrália iha akordu dahuluk entre Timor-Leste ho Austrália no akordu sira ne'ebé halo antes kona-ba jestaun ho fahe rekursu sira (CMATS).

"Bainhira laiha tratadu dahuluk, ami sei laiha rekursu sira hodi halo tratadu darual. Lahó CMATS ami sei la ratifika no lahó ne'e sei la avansa mós ho Bayu Undan no ami sei laiha Fundu Petrolíferu ne'ebé iha total fó ona ba Timor-Leste osan dolar biliaun 20", nia hanoin hikas.

Konferénsia Rejional hosi Ázia-Pasífiku hakarak analiza oportunidade foun sira hosi investimentu no komérsiu entre Austrália ho Alemaña, no mós hosi nasaun rua ne'e iha rejiaun Ázia ho Pasífiku.

Alkatiri admiti ona katak, tanba situasaun polítika iha Timor-Leste nia hanoin atu aseita ka la'e konviti ba vizita Perth, ne'ebé hanesan nia vizita dahuluk ba estranjeiru dezde nia simu pose iha loron 15 Setembru.

"Iha vontade ida hosi Governu australianu hodi haree ha'u nia partisipasaun. Situasaun polítika iha Timor-Leste seidauk klarifika loloos maibé hafoin ne'e ha'u konsidera katak hanesan oportunidade ida hodi haree to'o iha ne'ebé maka Timor-Leste bele hetan benefísiu hosi vontade hodi halo investimentu iha nasaun", nia hatete.

Iha meza, aleinde projetu sira seluk, iha mós investimentu boot ida iha rejiaun Baucau ne'ebé inklui investimentu projetadu hosi fábrika simenti nian, parke solar ida no projetu adisional sira seluk.

"Hanesan investimentu ida ne'ebé labale lakon, ne'ebé oferese oportunidade hosi produsaun enerjia nian hosi fonte renovável sira ne'ebé bele hatama enerjia ne'e iha rede no hamenus ami nia kustu enerjétiku sira", Alkatiri konsidera.

"Baucau hanesan odamatan hodi tama iha zona leste nasaun nian, rejiaun ida ne'ebé iha potensialidade oioin, iha área sira turizmu nian, maibé mós iha industria extrativu. Hodi iha ekilibriu oituan iha fundu petrolíeferu ami presiza fonte sira seluk no fonte sira hosi indústria transformadora ho extrativu hanesan sira ne'ebé maka ami bele dezenvolve lalais", nia hatutan.

SAPO TL ho Lusa