Estadu Seidauk Masimu fo Tratamentu ba Veteranus

DILI - Durante tinan sanulu resin lima indepedensia maibe estadu liu husi governu sedauk masimu fo tratamentu ba veteranus sira. Tanba nee husu ba estadu ba future tenki halo tratamentu neebe hanesan.

Lia fuan hirak nee hatoo husi Reprezentante Komite 12 de Novembru Rogerio Castro da Cruz ba STL iha nia knar fatin Eis-Komarka Balide Dili Kinta, (21/12/2017).  Nia dehan tan katak tuir Komite 12 de Novembru nia haree durante nee estadu sedauk valorija veteranus sira ho masimu.

“Tuir ami komite nia haree atu valorija veteranus sedauk masimu. Tanba tratamentu nee  diferensia veteranus ho povu no veteranus ho veteranus. Governu tau liu atensaun ba veteranus sira neebe publiku kunhese maibe tau ses tiha veteranus sira neebe mak sai liman, ain atu hatutan maun boot sira nia orentasaun durante luta libertasaun nasional tinan 24 liu ba,”nia kualia.

Ida nee signifika katak estadu liu husi governu fo atendementu especial ba liu veteranus neebe mak nia naran boot oun publiku kunhese. Maibe latau konsiderasaun ba veteranus balun neebe iha tenpu 24 anos hatutan ona liman ain lideransa nasional nian iha tenpu rejistensia ba luta libertasaun nasional.

Diretor Ezekutivu HAK Manuel Monteiro Fernandes dehan tuir lei neebe ejiste katak halo tratamentu saude ba sidadaun hotu hanesan tanba iha direitu neebe hanesan moos. Maibe tratamentu veteranus sira konsidera governu fo diferente ho ema povu babain tanba deit moras ema veteranus ida nia lahanesan ho ema povu babain. 

Justinho Manuel | Suara Timor Lorosae