USAID anunsia apoiu hodi hametin área turístiku iha Timor-Leste

Ajénsia koperasaun norte-amerikanu USAID anunsia, iha loron-kuarta ne'e, akordu ida ba programa ida dezenvolvimentu nian hosi área turizmu iha Timor-Leste ne'ebé hakarak aumenta estratéjia Governu nian iha área ne'e, esplika hosi organizasaun liuhosi komunikadu.

"Turizmu ba ema tomak" hanesan dezignasaun hosi programa ne'ebé sei implementa hosi Chemonics International no ho nia parseiru sira, Solimar International ho Planet Partnerships, no halo parte iha estratéjia nasional turizmu nian ne'ebé aprovadu iha tinan liubá hosi Governu timoroan nian.

USAID nia previzaun maka programa hamosu atividade ho investimentu komunitáriu sira no ekoturizmu iha folin besik dolar millaun 25, kria serbisu rihun resin no ajuda hadi'a rendimentu hosi komunidade sira ne'ebé abranje iha 15% iha tinan tolu.

Projetu, hosi tinan tolu, sei aposta iha "koperasaun públiku-privadu hodi promove Timor-Leste hanesan destinu ida ladún koñesidu ba turizmu aventura ho ekoturizmu, hodi buka komplementa estratéjia hosi Governu ne'ebé kalkula katak to'o tinan 2030 nasaun sei simu turista rihun 200 tinan-tinan.

Previzaun hosi Governu maka área ne'e bele hasoru serbisu rihun 15 no reseita anula besik dolar millaun 150, rekorda hosi USAID nian komunikadu.

Projetu ne'ebé fó sai ne'e sentra iha "kriasaun hosi turizmu inkluzivu, hadi'a jestaun iha área no promosaun hosi investimentu sustentável", ajuda "hadi'a no aumenta forsa serbisu turizmu nian", atividade ekonómiku ne'ebé tuir Ezekutivu sei fó serbisu ba ema na'in 4.300 resin.

"Ajuda hosi povu amerikanu ne'e sei ajuda Governu Timor-Leste nian hodi hetan objetivu prinsipal sira dezenvolvimentu nian, tanba buka diversifika nia ekonomia, ne'ebé agora daudaun bazeia iha área petróleu nian", esplika hosi Diana Putman, diretora hosi misaun USAID nian iha Timor-Leste.

"Ami senti ansiozu tanba bele serbisu ho Ministériu Turizmu no área privadu hodi halo Timor-Leste hanesan destinu turístiku ida ba ema sira ne'ebé buka aventura, kultura ho furak natural, hodi prezerva patrimóniu ambiental ho kultural úniku hosi nasaun", nia adianta.

Aprova iha fulan-Marsu tinan liubá, polítika nasional turizmu Timor-Leste nian defende "dezenvolvimentu gradual ida no sustentável" ne'ebé proteje meiu ambiente, aumenta vizita turístiku sira no hadi'a oportunidade ekonómiku sira iha nível nasional no komunitáriu.

Tuir komunikadu, USAID hakarak tau hamutuk ba projetu Parseria Nasional Dezenvolvimentu Turizmu públiku-privadu ida, nune'e mós ho Konsellu sira Jestaun Destinu nian, hodi "ajuda komunidade sira hod jere zona sira no atividade lokal sira turizmu nian".

SAPO TL ho Lusa