Prezidente Repúblika promulga dekretu-lei kona-ba estatutu Konsellu Kombatente nian

Prezidente Repúblika timoroan anunsia, iha loron-segunda ne'e, katak promulga ona dekretu-lei kona-ba estatutu hosi Konsellu Kombatente sira ba Libertasaun Nasional nian, ne'ebé hein katak sei sai hanesan órgaun sentral hosi asosisaun tomak hosi veteranu sira Timor-Leste nian. 

Tuir informa iha loron-segunda ne'e hosi gabinete Prezidénsia Repúblika katak diploma ne'ebé promulga ona iha loron 21 liubá, "defini estrutura, objetivu sira ho kompeténsia sira hosi Konsellu Kombatente sira nian".

Nota ida hosi Prezidénsia refere katak konsellu foun bele "halibur veteranu tomak hodi, hamutuk, kontinua kontribui ba dezenvolvimentu nasional".

Konsellu hanesan "asosiasaun ida hosi direitu públiku, konstitui ona órgaun sentral hosi asosiasaun tomak veteranu sira nian iha Timor-Leste" no órgaun ida konsulta nian hosi Governu ba asuntu sira veteranu nian.

Iha komunikadu, Prezidénsia esplika katak xefe Estadu Francisco Guterres Lu-Olo promulga ona diploma "tanba hakarak envolve duni veteranu sira iha prosesu dezenvolvimentu nasional no kontribui, liuhosi Konsellu ne'e, ba prosesu hodi hadi'a veteranu sira nia moris".

Versaun dahuluk hosi diploma hetan impedimentu hosi xefe Estadu iha 2017 tanba konsidera katak iha "dúvida oioin kona-ba dispozisaun sira hosi diploma, ligadu ba aspetu sira konstitusionalidade no legalidade nian".

Prezidente agora esplika katak iha momentu ne'ebá la asina dekretu-lei "tanba hakarak diploma legal ida ho kualidade di'ak hodi prevene atu mosu problema prátiku sira aplikasaun nian".

"Prezidente Repúblika hein katak entidade públika tomak no komponente privadu sira bele iha empeñu hamutuk hodi konkretiza ita hotu nia mehi - inklui hosi veteranu sira ne'ebé iha tinan barak nia laran dedika tomak ba kauza independénsia nian - hodi ita bele senti loloos rezultadu sira hosi Independénsia nian", refere hosi komunikadu.

Esplika mós katak promulgasaun "hanesan parte hosi kumprimentu kompromisu polítiku hosi Prezidente Repúblika hodi konsentra durante nia mandatu kestaun hosi Kombatente sira Libertasaun Nasional nian no Luta hosi Veteranu sira ba Independénsia nian".

SAPO TL ho Lusa