Lú Olo Sujere VIII Governu Gasta Fundu Minarai ho Kuidadu

DILI, (TATOLI) - Prezidente Repúblika, Francisco Guterres Lú Olo, husu ba Governu foun ne’ebé mai atu gasta fundu minarai ho kuidadu atu bele garante sustentabilidade nasaun no povu iha futuru.

“Ita haree iha sidade Dili laran de’it povu komesa ki’ak dadauk. Uma ba populasaun kondisaun ladi’ak, defikuldade ba bee-moos no ita haree mós ekonomia, katak, ita nia osan minarai ne’e hela de’it ona biloens $16. Tanba ne’e, atu gasta osan ne’e tenke gasta halo didi’ak, nune’e ita nia oan no beioan sira mai ne’e labele sofre,” Xefe Estadu hato’o kestaun ne’e ba jornalista sira liuhusi konferénsia ba imprensa ne’ebé hala’o iha salaun Prezidente Nicolau Lobato, Bairru Pité, Dili, semana ne’e.

Lú Olo informa, tempu ida ne’ebé maka hasai osan nar-naran de’it, tempu ne’e liu ona no tenke para ho ida ne’e.

“Tenke haree kona-ba ekonomia ita nia rai ninian, katak, buka meius oinsá atu hasa’e ekonomia rai laran nune’e ema hotu-hotu bele iha rendimentu ba sira nia moris rasik. Ita haree, tinan-tinan ita nia joven sira barak liu forma iha Embaixada Portugal nia oin atu hetan pasaporte hodi sai ba Irlanda no fatin sel-seluk buka moris. Bainhira kontinua nafatin hanesan ne’e, tinan lima mai tan joven hira maka sei sai ba ema nia rai,” nia dehan.

Antes ne’e, Prezidente Repúblika sujere ba estrutura atuál Meza Parlamentu Nasionál katak tenke halo jestaun rigorozu ba rekursu oituan liu ne’ebé iha no ida ne’e la’ós katak labele hasai osan maibé tenke halo jestaun halo didi’ak para bele lori hadi’a nasaun ida ne’e.

 “Prezidente Repúblika sei fó atensaun nafatin ba buat sira ne’e hotu hamutuk ho órgaun soberania sira seluk atu oinsá ita bele haree futuru ida ne’e ba oin hodi bele garante moris ida sustentável ba ita nia rai no ita nia povu,” Lú Olo tenik.

Jornalista: Xisto Freitas | Editór: Manuel Pinto

Imajen: Prezidenti Repúblika, Francisco Guterres Lú-Olo. Imajen Mídia PR