Mehi no pensamentu polítiku Maun Boot Kay Rala Xanana Gusmão...

…nian no ninia  implementasaun iha procesu konstrusaun Estadu

Roger Rafael Soares * | opinião

“Viva Timor-Leste”  expresaun ne′ebé Maun Boot Kay Rala Xanana Gusmão, uza bebeik, durante procesu históriku naruk iha autodeterminasaun ba ita nia rain. La trata deit nudar simples frase ida. Maibé, sim, frase ne′ebé nakonu ho firmeza no determinasaun, husi expresaun ida ne′ebé karega ho emosaun bo′ot, sentidu nasionalista, dejezu ne′ebé inkansável atu alkansa direitu ba Timor Leste, konsekuentemente, paz ba ninia povu.

Alkansada ona etapa ida husi mehi Maun Boot nian, Timor Leste hetan independénsia no sai ona nudar Nasaun ida soberana iha mundu. Maibé figura no lideransa Maun Boot nian, iha procesu ba konstrusaun Estadu no Nasaun Timor Leste, sei nafatin inkontornável no desijivu durante tinan senulu resin nen nia laran.

Maun Boot nia mehi agrega objektivu prinsipal rua: hetan ukun rasik an ba Timor Leste, ne′ebé rekoñesidu, internasionalmente, iha loron 20, fulan Maiu, tinan 2002. Dezde momentu ne′eba persiste objektivu segundu, dezenvolvimentu nasional, ne′ebé proporciona ba povu tomak, ho forma ne′ebé justa no hanesan, acesu ne′ebé permite vivencia hodi hetan moris diak ho dignidade no kualidade, iha teritóriu Timor laran tomak.

Nudar instrumentu polítiku husi luta ne′ebé koresponde ba kada objetivu Maun Boot nian, hamosu Conselho Nacional de Resistência Timorense (iha momentu resistensia nia laran)  no hafoin, funda no sai nudar prezidente ba Congresso Nacional de Reconstrução Timorense (CNRT) − instrumentu rua ne′ebé hatur iha objetivu ida deit - defesa ba interese nasional no dezenvolvimentu nasional.

Iha kada momentu históriku Timor Leste nian, Xanana Gusmão sempre hatene, ho forma ne′ebé diak no elegante tebes, mobiliza no haforsa unidade nasional, ne′ebé sai nudar motor aranke importante no principal hodi implementa metas no objetivu husi Nasaun no husi Povu.  

Duante procesu dezenvolvimentu nasional, Maun Boot sempre proporsiona, ho empenhu ne′ebé boot no maka′as hodi arketekta no hadiak sistema Nasaun nian, ne′ebé sai nudar aliserce importante, no mos meius esenciais ba funcionamentu diak husi sistema demokratiku no seguransa, atu nune′e bele fo solusaun adekuada ba problemas sociais no ekonomikus ne′ebé Nasaun no Povo hasoru.

Iha momentu rejisténsia Maun Boot konta ho partisipasaun povu nian, ohin loron mos, alkansadu tiha ona ukun rasik an, Maun Boot konta nafatin ho povu iha procesu konstrusaun Estadu-Nasaun, ne′ebé koinside tebes ho lema ne′ebé Maun Boot rasik maka designa “ Libertada a Patria e libertemos o Povo”, projetu boot ida ne′ebé exije empenhu, dedikasaun no esforsu atu humutuk ida deit ho povu, hodi fo kontinuidade ba implementasaun Planu Estratejiku Desenvolvimentu Nasional, iha ne′ebé reflete aspirasaun no mehi husi timor ona tomak nian hodi moris iha prosperiedade nia laran.

Ohin, Maun Boot hakerek tan istória foun iha procesu konstrusaun Estadu−Nasaun: Vitória ba Delimitasaun Fronteira Marítima ho ita nia nasaun viziñu, kadoras dada mai Timor Leste − vitórias ne′ebé komprova esforsu no sakrefisiu Maun Boot nian hodi luta atu hasai povu timor tomak husi kiak no mukit nia laran −, komprometidu dunik ho promesas eleitorais iha eleisoens jerais rua ne′ebé liu ba. Ohin mos ita bele afirma katak Maun Boot nudar figura polítika destakada iha país, nunka falha iha ninia kompromisu politiku eleitoral. Politiku sériu no responsável ne′ebé kumpri promesa sira sein reserva, promesas ne′ebé Nia promete duranta kampaña eleitoral. Nune′e, hamutuk ho Maun Boot, ita loke kapítulu foun iha prosesu konsolidasaun Estadu−Nasaun, prosesu  ne′ebé hatur iha konkretizasaun ba mehi sira: mehi atu lori dezenvolvimentu humanu no fíziku ba ita nia rain, mehi atu muda povu nia moris, liu husi kriasaun kampu servisu ba joven sira, mehi atu moderniza ita nia rain. Mehi ita hotu nian!

Parabéns Maun Boot, Kay Rala Xanana Gusmão!

Rojer Rafael T. Soares | Ailiili, Manatuto, Timor-Leste

rrtsoares@hotmaill.co