Prezidente Parlamentu Nasional
timoroan apela iha loron-kuarta ne'e ba "nasaun belun sira" hodi
aprova portugués nu'udar lian serbisu Uniaun Interparlamentar nian (UIP) iha
Asembleia Jeral instituisaun ne'ebé maka halao iha fulan ne'e iha Jenebra.
"Ida ne'e asuntu importante
ida no, bainhira ha'u eleitu hanesan prezidente parlamentu, asuntu dahuluk
ne'ebé maka ha'u trata maka luta ba introdusaun lian portugueza hanesan lian
serbisu UIP nian", afirma Arão Noé Amaral iha deklarasaun ba Lusa.
"Ha'u haruka karta barak ba
nasaun ASEAN no G7+ hodi bele hetan apoiu iha votasaun ne'e. Ha'u hein katak,
ho ha'u nian prezensa no intervensaun ne'e iha UIP, bele hetan apoiu hosi
nasaun belun sira no fó votu favoravel ba inisiativa ida ne'e", akresenta
tan.
Arão Noé Amaral lidera delegasaun
parlamentu timoroan nian ne'e maka sei partisipa, entre loron 14 no 14 Outubru
iha Jenebra, iha Asembleia Jeral Uniaun Inter Parlamentar (UIP) nian ba dala
139, ne'ebé maka kestaun ne'e sei iha votasaun.
"Ida ne'e sei sai luta ida
hodi ita bele too iha ne'ebá. Numeru ba ema ne'ebé koalia lian portugués iha
mundu ne'e signifikativa tebes no, tanba ne'e, portugués merese sai nu'udar
lian ba serbisu nian iha instituisaun hanesan UIP", hatete.
Portugal lidera hela esforsu
diplomatiku sira, liu-liu hamutuk ho nasaun luzofonu sira seluk, hodi konsegue
portugués aprovadu nu'udar lian serbisu nian iha Asembleia Jeral instituisaun
ne'ebá nian, ne'ebé maka sei halao iha fulan ne'e iha Jenebra.
Tan ne'e presiza alterasaun ida
ba estatutu sira organizasaun nian, pozisaun ne'ebé espresa iha karta ida ne'ebé
maka deputadu portugués Duarte Pacheco haruka ba responsável parlamentar
luzofonu sira.
"Ho delegasaun portugueza
nian naran ha'u solisita interese hamutuk ho grupu jeopolitiku ne'ebé maka
insere, no mós korpu diplomatiku hamutuk ho Estadu belun sira, hodi bele hetan
apoiu ho numeru ne'ebé boot ba proposta ne'ebé maka haforsa ba hotu-hotu no haboot
UIP rasik", refere karta ne'e.
"Ida ne'e hanesan ideia
únika ida. Ita la hatene bainhira maka iha fali oportunidade ida hodi inklui
portugués nu'udar lian serbisu UIP nian, so ho hotu hotu nian interese no ita
ida-idak maka bele alkansa rezultadu ne'ebé maka ita hotu hein", subliña.
Objetivu maka kestaun ne'e bele
debate no votada iha asembleia-jeral fulan MArsu nian, maibé asuntu ne'e adiadu
tiha.
Mexikana Gabriela Cuevas Barron,
prezidente UIP nian, assume durante ninian kampaña ba kargu kompromisu ida hodi
inklui portugués, espñol no árabe nu'udar lian ofisial organizasaun nian, atu
nune'e bele sai inkluziva.
Objetivu ne'ebé akollidu ho
"rezerva sira" hosi nasaun oioin, tanba ne'e objetivu ne'e alteradu
hodi bele konsegue portugués sai nu'udar lian ofisial serbisu nian, destaka mós
hanesan lian ofisial Estadu membru sia UIP nian no ne'ebé maka koalia liu iha
emisfériu-súl.
Iha karta ne'ebé haruka ba
parlamentu luzofonu sira, Duarte Pacheco refere kataka mesmu ke opsaun ne'e
preokupa nasaun balun, tanba impaktu balu iha kustu sira, ho konsekuénsia, iha
kontribuisaun nasional.
Deputadu portugués hatete katak
iha merkadu bele hetan solusaun ne'ebé baratu liu ne'ebé maka atualmente uza
iha UIP no konkretiza introdusaun ba lian portugués.
Konabá kestaun ne'e, Arão Noé
Amaral aproveita ninian viajen ba Jenebra hodi fó konta konabá avansu
demokratiku iha Timor-Leste.
"Timor-Leste sempre a favor
ba democrasia. Dezde proklamasaun independénsia nian, iha loron 28 Novembru,
maka ita defini Republika Demokratika de Timor-Leste. Demokrasia maka ita nian
prinsípiu no ita luta too ita nian ran ikus tanba ne'e maka guerilleiru sira
barak mate tanba defende demokrasia", konsidera.
"No agora ita iha debate ba
diferensa politika interna, maibé ha'u sente ida ne'e sei la afeta prosesu
demokratiku iha Timor-Leste" hatete tan.
SAPO TL ho Lusa
Sem comentários:
Enviar um comentário