DÍLI, (TATOLI) - Uniaun Europeia
(UE) no Governu Timor-Leste, liuhusi Ministériu Negósiu Estranjeiru no
Kooperasaun (MNEK), ohin, asina akordu rua ba finansiamentu UE ho valór millaun
15 euro atu kombate malnutrisaun no euro millaun tolu para fó asisténsia
téknika ba tinan lima oin mai.
Asinatura ne’e hala’o husi
embaixadór UE ba Timor-Leste, Alexandre Leitão nomós MNEK husi Ministru
Dionísio Babo Soares.
“Investe iha nutrisaun mak
esensiál, la’ós de’it atu promove bem estar ba populasaun, maibé
importante mós ba kreximentu ekonómiku Timor-Leste nian,” hateten Embaixadór UE
ba Timor-Leste, Alexandre Leitão perante mídia, iha edifísiu MNEK, Praia dos
Coqueiros-Díli, ohin lorokraik ne’e.
Embaixadór mós fó hanoin katak UE
úniku parseiru ba kooperasaun ne’ebé konsege apoiu finanseiru diretu ba
orsamentu estadu, no iha programa ne’e, dolár millaun 11 sei selu ba modalidade
ida ne’e, ne’ebé estadu mak responsabiliza ba ezekusaun programa no reprezenta
mós hanesan sinál konfiansa ida UE nian ba kapasidade Administrasaun Públika
timoroan sira nian.
Iha fatin hanesan, Ministru
Dionísio Babo Soares haktuir katak UE nia apoia finanseiru ne’e barak liu
programa transversal katak programa ne’ebé la iha relasaun ho polítika.
“Ba liu buat sira hanesan direitu
umanu, hadi’a nutrisaun ema nian; ba inan isin-rua, labarik sira menus cinco
anos, ita-nia joven, foinsa’e ne’ebé nutrisaun la iha. Ne’ebé, ita tenke
matenek uza oportunidade hato’o proposta para bele hetan. Ita Timor-Leste
konsege,” dehan governante ne’e ba jornalista sira.
Ministru Dionísio Babo informa
katak hafoin asina ho UE, osan ne’e sei entrega ba governu liuhusi orsamentu
estadu nian no depois uza ba munisípiu 13 hotu kedas ba hadi’a nutrisaun
ba ita-nia inan isin-rua sira, joven sira no labarik ki’ikoan sira.
“Tanba tuir indíse internasionál
ne’e katak joven sira sofre buat ida, sira bolu dehan ‘nanismu’; labarik sira
krekas, forsa la iha, dezde ki’ikoan mai hahan ladun di’ak, sira presiza duni
iha atensaun espesiál porque aban bainrua, labarik sira ne’e mak sei
kaer nasaun ida ne’e nia futuru,” konsidera diplomata timoroan ne’e.
Governante ne’e esplika,
Ministériu Saúde (MS) hamutuk ho UNICEF (Organizasaun Nasaun Unida ba Apoiu
Fundu ba Labarik sira-sigla ingles), liliu MS para prepara sira-nia kuadru sira
halo programa ne’e di’ak no tenke ba kona kedas alvu. “Labele osan ne’e mail
abele gasta ba buat ne’e la iha efeitu”.
Nune’e mós, governante ne’e
akresenta katak ita sei mobiliza nafatin. “Ha’u hanesan koordenadór nasionál
fundu Europeu nian, sei buka nafatin, haree tan apoiu sira seluk ba iha
instituisaun governu. Liliu, ba benefísiu povu iha karaik,” informa MNEK,
Dionísio Babo Soares.
Entretantu, asina akordu rua
ne’ebé hala’o husi MNEK ho UE ho valór total euro millaun 18, kuaze millaun 20
no dolár rihun 450. Husi valór hirak ne’e, millaun 15 (kuaze dolár rihun 17)
sei dedika ba programa PINTL (Parceria Para Melhorar a Nutrição em
Timor-Leste), ne’ebé apoiu asaun destinada atu reduz insidénsia ba malnutrisaun
ba inan isin-rua, inan sira ne’ebé fó susu, ba labarik no adolsente ne’ebé
menus husi tinan lima. Atensaun espesiál sei fó ba labarik sira ho loron moris
1000 nian.
PINTL iha objetivu espesífiku atu
kontribui ba melloria nutrisaun nian no kondisaun vid aba feto rihun 500 ho
idade reprodutiva, inan isin-rua rihun 28 no ba labarik na’in rihun 120 menus
husi tinan lima.
Atu hetan efeitu, PINTL sei
promove aumentu kualidade no integrasaun ba polítika públika iha setór saúde,
hadi’a prátika alimentár no prestasaun ba kuidadu labarik sira iha família nia
laran no prátika komunitária ba ijiéne no saneamentu.
Iha Timor-Leste, kuaze métade
husi labarik menus husi tinan lima sofre hamlaha no 2/3 aprezenta sinál anemia.
Kuaze ¼ ba feto sira iha pezu menus liu no na’in rua husi kada feto na’in lima
hetan anemia. Fatór hirak ne’e mak kontribui fó nafatin siklu inter-jerasionál
ba malnutrisaun, no labarik hirak ne’ebé mai husi inan ne’ebé iha malnutrisaun
hetan risku boot liu no moris ho pezu menus, anemia no perturbasaun sir aba
kreximentu fíziku no neorolójiku.
Tuir estimativa Ministériu Saúde
nian, malnutrisaun reduz kada tinan ekonomia Timor-Leste hamutuk dolár millaun
41.
Enkuantu, euro millaun tolu
(dolár rihun 3,4) ne’e akordu finansiamentu ba “Facilidade de Apoio à
Cooperação-CSF”. CSF nia objetivu mak atu mellora kapasidade estadu Timor atu
partisipa ativamente iha parseria ba kooperasaun UE nian, particular liu iha
jestaun ba montante disponibilizadu liuhusi Fundo Europeu de Desenvolvimento
(FED).
Liuhusi FED sei ezekuta programa
kooperasaun Europeia iha Timor-Leste ho valór dolár millaun 130. “País joven
hanesan Timor-Leste, la’ós de’it atu koloka osan ba dispozisaun estadu nian,
maybe presiza mós ajuda estadu ne’e atu iha kapasidade ne’ebé di’ak atu jere
osan ho rigór no efikásia,” hatutan tan Embaixadór Alexandre Leitão.
Jornalista: Rafy Belo | Editór:
Manuel Pinto
Sem comentários:
Enviar um comentário