DILI, (TATOLI) – Reprezentante
sosiedade sivíl kompostu hosi Forum Organizasaun Naun Governamentál Timor-Leste
(FONGTIL), Rede HASATIL no Rede Feto Timor-Leste konsidera alokasaun Orsamentu
Jerál Estadu (OJE) 2019 akontese dezigualdade.
Reprezentante sosiedade sivíl
hirak ne’e hato’o ba jornalista sira iha Palásiu Prezidente Nicolau Lobato,
Bairru Pité, segunda ne’e hafoin hala’o enkontru ho Prezidente Repúblika,
Francisco Guterres Lú Olo, kona-ba alokasaun OJE 2019 ba setór dezenvolvimentu.
Diretór FONGTIL, Daniel Santos do
Carmo, hateten situasaun sósiu ekonomia iha rai-laran presiza Estadu nia
intervensaun liuhusi OJE atu bele sustenta ekonomia no dezenvolvimentu, maibé
alokasaun orsamentu ladún haliis ba situasaun ne’ebé povu maioria moris ba
(agrikultura).
“FONGTIL ho ninia membru sira
halo auditoria sosiál iha área agrikultura, edukasaun, saúde no infraestrutura
báziku no nia rezultadu ami enkamiña ona ba Governu no Parlamentu atu tau
prioridade ba setór sira ne’e, tanba ne’e parte hosi investimentu ne’ebé
sustentável ba dezenvolvimentu ba rai ida ne’e, maibé en-felizmente akontese
dezigualdade iha ninia alokasaun orsamentu”, afirma Daniel.
Iha fatin hanesan, Diretór Rede
HASATIL, Gil Horacio Boavida, realsa alokasaun orsamentu ba setór agrikultura
ne’ebé ho porsentu ida de’it ne’e la koresponde ba situasaun real iha baze,
tanba maioria povu Timor ne’e moris ho agrikultura.
“Se ita luta ba povu nia moris
di’ak, entaun investimentu ida ne’e sai hanesan ezijénsia ida ne’ebé prinsipál
atu fó atensaun. Ami hein katak karik iha tempu bele hadi’a fali alokasaun
orsamentu ida ne’e para bele fó nafatin prioridade ba setór agrikultura”,
rekomenda.
Aleinde ne’e, Diretór Rede Feto,
Judith Diaz Ximenes, mós preokupa ba alokasaun orsamementu ba setór
agrikultura.
Jornalista: Xisto Freitas | Editora:
Rita Almeida
Imajen: Reprezentante sosiedade
sivíl sira ko’alia ba jornalista sira iha Palásiu Prezidente Nicolau Lobaro,
Bairru Pité, segunda ne’e, hafoin hala’o enkontru ho Xefe Estadu Lú Olo. Imajen
Ajénsia Tatoli/Xisto Freitas
Sem comentários:
Enviar um comentário