Ohin loron Indonézia iha imprensa
livre ida, maibé moris iha períudu ida presaun nian hosi elementu relijiozu
sira ne'ebé hamosu aumentu ba limitasaun sira iha liberdade kultural, konsidera
hosi jornalista ida ne'ebé kombate ona hasoru Suharto nia ditadura.
"Ohin loron ami iha media
ida livre tebes, ami la presiza atu iha lisensa famozu sira, Governu labele
sensura ka uza arma lisensa nian", Goenawan Mohamad, ohin loron nu'udar
eskritor ho pintor, maibé uluk hanesan jornalista ho fundador hosi revista
Tempo - revista dahuluk ida ne'ebé iha tinan 1990 hosi sékulu liubá dezafia ona
Orde Baru hosi Suharto (ne'ebé iha poder entre 1967 ho 1998), esplika ba Lusa.
"Maibé agora kestaun
liberdade espresaun nian la'ós hanesan liu kona-ba liberdade imprensa. Hanesan
liuliu kona-ba espresaun kultural sira, submetidu ba presaun hosi elementu
relijiozu sira ne'ebé la gosta espresaun livre sira iha poezia, fiksaun ka
filmi", nia konta.
Fulan balun hodi kumpri tinan 78,
Goenawan Mohamad senti konviktu iha ideial sira, maski sei dook hosi mundu
jornalizmu nian, adaptadu ba Indonézia demokrátiku foun.
Sosiedade ida ne'ebé sei
evidensia ho aumentu ida konservadorizmu relijiozu, "la'ós de'it entre
musulmanu sira maibé, liuliu, entre kristaun sira".
"Loos duni katak entre
musulmanu sira aumenta daudaun. La nesesáriu ba violénsia ka intoleránsia maibé
iha konservadorizmu", nia esplika.
Goenawan Mohamad hatete katak
aumentu hosi uzu "hijab" hosi feto musulmanu sira - hanesan domina
iha estrada sira iha sidade boot Jakarta, kapital indonéziu - hatudu
"lakon ida hosi liberdade espresaun fíziku nian".
"Hanesan ida ne'ebé vizível
tebes, hanesan ezemplu iha forma oinsá ema sira hatais, hanesan autokontrolu
ida iha espresaun fíziku sira. Iha tinan 25 liubá kuaze laiha ema ida maka uza
'hijab'", nia konta.
Iha momentu ne'ebé maka debate
entre sekularizmu ho konservadorizmu relijiozu marka ona debate ba eleisaun
loron 17 Abril liubá, Mohamad hatete katak Indonézia presiza fó tan mandatu ida
ba Joko Widodo, atual xefe Estadu.
"Nia iha knaar importante
ida hodi halo iha nasaun. Mai hosi ema sira ne'ebé kiak liu, hatene no
komprende di'ak problema sira ne'e. Suharto mós uluk pertense ba família kiak
ida. Maibé nia to'o iha poder hosi ezérsitu nia poder no Jokowi hanesan
eleitu", nia hatete.
"Iha buat barak atu halo.
Tinan lima hanesan oituan ba nasaun ne'e, ne'ebé hanesan kompleksu no boot
tebes. Tinan sanulu hanesan di'ak liu", nia nota.
Rezultadu eleitoral sira sei fó
sai to'o loron 22 Maiu, maibé Widodo reklama ona releisaun, ho 54% hosi votu
sira, bainhira nia adversáriu Prabowo Subianto hatete katak hetan 62% hosi votu
sira iha eleisaun sira.
Antigu jornalista deskreve nasaun
ida ne'ebé influénsia hosi militar sira hanesan ki'ik no, tanba ne'e, haree
inveja ne'ebé hatudu relasionadu ho aumentu hosi polísia nia knaar, ho aumentu
hosi rekursu sira no knaar ida ne'ebé iha liu papel importante iha luta kontra
terorizmu, hanesan ezemplu.
Indonézia ida ne'ebé "labele
sai loloos hanesan kapitalista tanba negósiu barak sei kontrola hosi
Estadu", ne'ebé korupsaun aumenta maski iha emprendedora klase média
ne'ebé boot no barak.
Nia deskreve joven sira ne'ebé
"tenki aprende istória" nasaun nian, tanba "agora sira hanesan
livre no bele halo krítika ba Prezidente", sira "la hatene katak uluk
ne'e labele halo" ka sira la hatene" saida maka presiza hodi bele
hetan liberdade ne'e".
Maski nune'e, nia hatudu
otimista, ho vontade atu mudansa ne'e halo "ho dalan normal no lahó
kombate ideolójiku sira entre seksaun sira hosi 'sharia' [direitu islámiku] ho
sekular sira", hodi hatán ba asaun barak ne'ebé presiza atu halo.
"Sistema edukativu hanesan
aat tebes, disparidade sosial sira kontinua maka'as nafatin. Situasaun
ekonómiku sei hanesan instável", nia esplika.
Iha tinan 1990, iha sékulu liubá,
nia uluk hanesan imajen ida hosi imprensa ne'ebé luta ona hasoru Orden Foun
mundial. Agora nia hatete katak luta seluk ida, kontra influksu informasaun
hosi rede sosial sira, ho konteúdu "fa'an hanesan notísia sira",
maibé ne'ebé "la respeita regra báziku sira hosi jornalizmu" ne'ebé
aumenta informasaun sira "falsu no la responsável" ne'ebé sei aumenta
beibeik.
Nia admiti katak, tanba ne'e, nia
senti satisfeitu tanba halo parte iha mundu arte nian.
Ho ókulu ne'ebé tau iha reen-toos
- ne'ebé nia husik monu dala rua durante konversa - lian frájil maibé asertivu
ho hamnasa konfiante ida no abertu, Goenawan Mohamad hatete katak senti
kontente no 'fit' tebes", bainhira sa'e eskada sira metal nian to'o nia
estúdiu.
Konversa hala'o iha sala ida hosi
kompleksu ne'ebé koñesidu hanesan "Komunitas Salilhara", sentru
privadu multidisiplinar dahuluk hosi arte Indonézia nian ne'ebé Goenawan
Mohamad ajuda harii ona iha tinan 2008 no ohin loron iha nia estúdiu.
"Ha'u artista iha tempu
tomak. Ha'u pinta, hakerek poezia, pesa teatru nian no kontu sira. Ha'u iha
ne'e", nia hatete hodi refere ba kompleksu ne'ebé instala iha fatin ida ho
kuaze rihun haat metru kuadradu, iha Universidade Nasional Indonézia nian sorin
iha Passar Minggu, iha súl Jakarta nian.
Edifísiu prinsipal tolu - teatru,
galeria ho eskritóriu sira - ho instalasaun adisional sira inklui estúdiu ida
ensaiu nian, pouzada ida ho anfiteatru ida.
Projetu ne'e harii hosi eskritór
oioin, artista sira, jornalista sira ho ema sira ne'ebé hadomi arte no dezde
nia fundasaun promove ona projetu artístiku sira ho modelu oioin, iha tinan
2010 konsidera ona hanesan "Fatin Di'ak Arte nian" hosi kapital
indonéziu.
"Komunitas Salihara” afirma
ona hanesan "sentru kultural alternativu" ida ne'ebé empeñadu hodi
"mantén liberdade hanoin no espresaun nian, respeitu diferensa sira ho
diversidade no promove no divulga rekursu artístiku sira ho intelektual
sira".
"Ami presiza afirma fali
vizaun ne'e, tanba iha Indonézia ohin loron, ne'ebé demokrasia eleitoral
implementa ona iha dékada rua ikus ne'e, liberdade hanoin no espresaun nian sei
hetan ameasa - hosi instrumentu sira Estadu nian - ka hosi área sira hosi
sosiedade rasik, liuliu grupu sira ne'ebé halo asaun hodi grupu relijiozu balun
ka grupu étniku sira nia naran", nia refere.
Prioridade ba arte foun sira
maibé mós rekoñese ho promove "atitude kriativu ida kona-ba heransa
artístiku diversifikadu hosi Indonézia no hosi mundu".
"Loron ida ami sei iha
artista portugés sira iha ne'e", nia hatete.
Lusa | SAPO TL
Sem comentários:
Enviar um comentário